Telelanerako lan espazio onena, gizonentzat

London School of Economics-eko soziologa Cabo Aliya Hamid Raok ikerketa egin du, pandemiak emakume eta gizonen arteko arrakala handitu duen aztertzeko; emaitzek argi utzi dute gizonen lana izan dela lehentasuna, baita etxeko espazioa elkarbanatzeko orduan ere. 

Ikerketaren arabera, etxe gehienetan gizonen lanari eman zaio lehentasuna; gizonak izan dira etxeko bulegoa edo lan egiteko espazio egokiena okupatu dutenak; aldiz, emakumeek egongela ala sukaldea erabili dute telelana egiteko, kasu gehienetan aldi berean haurren zaintza burutuz edo etxeko beste hainbat jarduera eginez. Horrekin batera, emakumeak izan dira lan murrizketak edota lan uzte gehienak egin dituztenak, kontziliazio arazoei aurre egiteko.

Ikerketak sakon aztertu du etxeko espazioaren erabilera, eta ondorioen arabera, telelana egin duten gizonek etxeko espazio isil eta egokiena erabili dute, mahai eta aulki egokienarekin, argiztapenarekin eta etxeko gainontzeko eremuetatik aparte. Aldiz, emakumeek soberan zegoen espazioa erabili dute, kasu gehienetan egongela edo sukaldea, lan egiteko mahai edota aulki egokirik gabe. 

Ondorioz, emakumeek egindako telelana askoz ere zailagoa izan da; haurrak dituzten emakumeek soilik beren lanaren heren bat egin ahal izan dute etenik jasan gabe, eta gizonekin alderatuta egunean 1.7 ordu gehiago igaro dituzte etxeko lanez arduratzen. Emakume askok zaintza eta telelana aldi berean gauzatu dituzte, eta ondorioz, askok lanaldi murrizketa edo lan uztea aukeratu behar izan dute, etxeaz eta haurrez arduratzeko. 

Aldi berean, emakumeek estres gehiago jasan dute telelana burutzen; lanerako espazio propiorik ez izateak eta aldi berean etxeko kontuez arduratzeak izugarri igo du emakumeen antsietate maila. Hala, emakume askok goizeko ordu txikitan lan egitea aukeratu dute, isiltasun apur bat lortzeko helburuarekin.