Baietz egin: urteberrirako asmoak

Baietz egin: urteberrirako asmoak https://www.gaztezulo.eus/albisteak/baietz-egin-urteberrirako-asmoak/@@download/image/15p18-1.jpg
2002/01/04
erreportajea
Hemen da urte berria. Garai honetan jende askok urte berrirako helburuak jartzen dizkio bere buruari: erretzeari uztea, kirola egiten hastea, lotsa alde batera uztea, bizitzari baikor begiratzea, gehiago eta hobeto ikastea…. Hona hemen helburuotako zenbait lortzeko aholkuak. 

Pikutara tabakoa!
•-Erabaki ezazu zein egunetan utziko diozun erretzeari eta lagunei edo senitartekoei jakinarazi.
•-Tabakoa utzi baino lehen trebatu zure burua, zigarro batetik bestera tarte handiagoa utzita, adibidez.
•-Ariketa fisikoren bat egin.
•-Ur asko edan eta dieta osasuntsua egin. Etzazu gehiegi jan eta ahal den neurrian, kaferik eta alkoholik ez hartu.
•-Erretzeko gogoa ahaztariko dizuten jarduerak egin.
•-Saia zaitez batez ere erretzen ez duen jendearekin egoten.
•-Eraman ezazu patrikan gauzatxoren bat, eskuetan zerbait ibiltzeko. Txiklea jatea ere lagungarria izan daiteke.

Kirola osasun iturri

•-Aukera ezazu kirol bat. Ahal dela, gertuko lagun batekin egin ezazu.
•-Poliki-poliki hasi. Hasieran, egunean ordu erdi eginda nahikoa da.
•-Hasieran, batez ere, kirol saioak eta atsedenaldiak tarteka itzazu: egun batean kirola, hurrengoan atsedena, esaterako.
•-Eguna hobeto antolatu: goiz jaiki eta aldez aurretik pentsa ezazu kirola noiz egin behar duzun.
•-Bizimodu osasuntsua izan ezazu: dieta egokia, tabako eta alkoholik ez…
•-Ez huts egin. Sasoian egoteko eta ohitura ez galtzeko, onena oso maiz kirola egitea da, kale egin gabe.

Lotsaren kontrako borroka

•-Zure buruaz barre egiten ikasi behar duzu.
•-Nerbioak jota zaudenean, arnasa har ezazu eta saia zaitez beste edozertan pentsatzen.
•-Elkarrizketa batean nola parte hartu ez badakizu, egin ezazu galdera bat.
•-Talderen batean hitz egiteari beldurra badiozu, zerorrek hasi behar duzu elkarrizketa. Errazago egingo zaizu hortik aurrera solasaldiari eustea.
•-Saia zaitez noiz edo noiz zure janzkera edo orrazkera aldatzen.
•-Toki publikoetan bakarrik egoteak beldurra ematen badizu, behartu zure burua noizbehinka bakarrik ateratzera. Gauza txikiekin hasi, zinera joaten, adibidez.

Baikorra izan behar da.
Nola, ordea?
•-Lana ondo antolatu: mahaia txukun izan, arazoak lehenbailehen konpondu, lehentasunak ezarri…
•-Zaletasunak landu: mendira joatea, irakurtzea, puzzleak egitea….
•-Lagunekin elkartu. Lagunekin gaudela, ederki pasa dezakegu. Bestalde, arazorik izanez gero, beharrezkoa da norekin hitz egin izatea.
•-Kirola egin ezazu, ahal dela, aerobikoa (korrika egitea, oinez edo bizikletaz ibiltzea….). Parkean, kalean edo hondartzan bada, askoz hobe.
•-Egunargia bila ezazu. Adituen esanetan, eguzkiak alaitu egiten gaitu. Neguan, berriz, errazagoa da triste egotea edo depresioak jota ibiltzea. Beraz, eguraldi ona dagoenean, kalera atera zaitez.
•-Zure buruaz barre egin ezazu
•-Pentsa ezazu noiz egon ohi zaren umore onez eta noiz txarrez.

Ez da hain erraza ikastea

•-Betiko kontua: ez utzi dena azterketa bezperarako. Onena ikasturte osoan ikastea da.
•-Ikasten hasi aurretik, presta ezazu ordutegi bat. Ahal dela, ikasgaiak tarteka itzazu.
•-Asko jota, ordu t'erdiz segidan ikasi behar da. Ondoren, atsedenaditxo bat egin ezazu, hamar edo hamabost minutukoa.
•-Giro egokia bilatu. Utzi alde batera kontzentrazioa eragozten duen guztia.
Etzazu musika jar eta ez ikasi leiho baten aurrean. Eroso egon zaitez: mahaia, aulkia…. Argiztapen ona izatea ere garrantzitsua da.
•-Testua buruz ikasi behar baduzu, behin eta berriro errepikatu. Ez dago gaizki lagun batzuekin batera egitea.
•-Noiz edo noiz emaiozu gainbegiratua aurreko egunetan ikasitakoari.
•-Denbora luzez ikasi behar denean, etzazu ez gehiegi jan ezta kafe gehiegi har ere. Behar adina lo egitea ere funtsezkoa da.