Euskarazko ikus-entzunezkoen 'Euskalteka' plataforma aurkeztu dute

Euskaltelek eta EITBk euskarazko ikus-entzunezkoen plataforma berria, Euskalteka, aurkeztu dute, euskaraz sortutako edukiei eskuragarritasun eta irismen handiagoa emateko asmoz. Abiatzeko, EITBren saio arrakastatsuenen 300 orduko programazioa eskaintzen du, hainbat generotakoa eta publiko orori zuzendua. 

Euskaltelen Replayteka zerbitzuarren barruan txertatu dute Euskalteka. Nahieran kontsumi daitezke bertako edukiak eta Euskaltel telebistako harpidedunek doan eskura dezakete. Edukiari dagokionez, ETB1, ETB3, eta eitb.eus-eko saiorik ezagunenak topa daitezke bertan, hala nola Go!azen telesaila, Herri txiki, infernu haundi, Barre Librea eta Baserria reality-a. Helduentzako fikzioa ere bada ikusgai, Ihesaldia, Altsasu eta Alardea, esaterako. Haurrei zuzendutako 3 Ene kantak saioaren hainbat atal eta bestelako musika programak ere badira, esaterako Bidegurutzean, Gaztea B Aldea, Gaztea 30, 30,30 eta Gure Doinuak. Sukaldaritzak ere tarte handia du EITBren programazioan, eta plataforman ere Sukaldaria eta Joseba Arguiñano Sukalerrian aurkituko ditu ikus-entzuleak. Dokumentalen alorrean, berriz, Baskoniako Historia bat dokumental saila, Paperezko hegoak, Eten barik joten, Ni naiz Lete eta Txillardegi lanak egongo dira. 

Plataformaren bultzatzaileek jakinarazi dutenez, euskarazko produkzioak dituzten beste ekoiztetxe eta kanal batzuetara zabaltzeko asmoa dute, eskaintza aberasteko eta osatzeko. Hala, Euskalteka "euskarazko ikus-entzunezko kulturaren bilgune bihurtu nahi da", eta "zabalik dago euskarazko eduki gehiago bertan sartzeko, etorkizunean ikus-entzunezko sektorean erreferentziazko bideoteka bihurtu dadin".