#KuToo; emakume japoniarren iraultza
Zortzi orduko lanaldia takoien gainean. Egunero. Halaxe lan egin behar dute Japoniako enpresaritza munduko emakume gehienek; beren kontratuetan derrigortu egiten dituzte takoidun zapatak eramatea, eta askotan janzkera edota makillajea ere mugatzen dizkiete. Nazkaturik, #KuToo mugimendu feministak 19.000 sinadura aurkeztu ditu Japoniako Lan Ministeritzan, takoien derrigortasuna legez debekatu dezaten eskatuz.
Yumi Ishikawa aktore eta idazlearen txio batek hasi du #KuToo mugimendua; bertan, takoien derrigortasuna sexu eraso bat dela salatu zuen idazleak, eta politika horiekin amaitzeko deia zabaldu zuen. Hain zuzen, traola estuki lotuta dago #MeToo mugimenduarekin, hau da, lan munduko sexu jazarpenarekin. Hala, japoniarrek hitz jokoa egin dute kutsu (zapata) eta kutsuu (mina) hitzak erabiliz.
Ishikawak berak salatu duenez, eskatzen dutena da lesiorik jasan beharrik gabe lan egiteko eskubidea, gizonen modura. Ez dira janzkera derrigortasun diskriminatzaile horiek salatu dituzten herrialde bakarra; Erresuma Batuan ere antzekoa gertatu zen duela gutxi, Nicole Thorp langileak salatu zuenean lan egiteko gutxienez 5 zentimetroko takoiak eskatzen zizkiotela.