ZIRT-ZART: ANE LINDANE

ANE LINDANE AKTOREA (BILBO, 1988) TELEBISTA, IRRATI ZEIN SARE SOZIALEN BIDEZ EZAGUTU DUGU ETA BAITA BAKARRIZKETAK EGITEN ERE. UMORE ETA MINGAIN ZORROTZA DU ETA HALA ERAKUTSI DIGU GURI ERE.

• Zer talentu izatea gustatuko litzaizuke?
  Eztabaidetan gerora nire buruan okurritzen zaizkidan esaldi onak ematen jakitea.
• Miresten duzun norbaiti argazkirik edo autograforik eskatu al diozu?
  Ez, molestatuko ote dudan lotsaz. Carmen de Mairenarekin argazki bat izatea gustatuko zitzaidan…
• Zer abestik ematen dizu nazka?
  Rigoberta Bandiniren Ay Mamá-k.
  
  

• Zein da zure leloa bizitzan?
  Tontoarena egin ahal beste.
• Zer pentsatuko luke zure bertsio gazteagoak zutaz?
  “Azkenean gauzek hobera egin dute, eskerrak! Baina, arrosa koloreko ilea!?”.
• Zer hitz edo esaldi erabiltzen duzu behar baino gehiagotan?
  “Ni es daki. Ni Bilboko”.
• Nola irudikatzen duzu zure burua hemendik hogei urtera?
  Izerditan blai, aldaketa klimatikoaren eraginez.
• Interneten zuri buruzko gauzen bila aritu izan al zara?
  Nire nude-rik badagoen begiratzen dut RedTuben eta YouPorn-en. EHAAn ere bilatu izan dut nire izena.
• Zer da besteengan gehien gorroto duzuna?
  Taxiari “tasis” esatea, baina pizzari “pixa”. Eta magufokeriak.
• Noiz esaten duzu gezurra?
  Komisarian eta epaitegietan nagoenean.
  
  

• Zer da egin duzun erokeriarik handiena?
  Abortua, ETA, pederastia, eta kaka egiteari buruzko txisteak dituen bakarrizketak egitea.
• Zein izan da zure lorpenik handiena?
  Gipuzkoar bati barrea eragitea eta Xabier Lapitzek Nafarroa ondo ahoskatzea lortu izana.
• Zein pertsonaia historikorekin identifikatzen duzu zure burua?
  Carmen De Mairena.
  
  

• Zein da zure damurik handiena?
  Mozkortzen naizenean egiten dudan ia edozer gauza.
• Zein kanta aukeratuko zenuke bizitza osoan entzuteko?
  Carmen de Mairenaren Happy Barry.
• Zer soinu edo zarata gorroto duzu?
  Umeek egiten duten edozein soinu eta batez ere batukadak.
• Zer beste lanbidetan ez zinateke arituko?
  Polizia, irakaslea, eta Last Tour-eko presidentea.
• Fikziozko zer pertsonaia nahiko zenuke laguntzat?
  Gurasoen diruaren laguntzarik gabe eta ezerezetik arrakasta eta dirutza izatea lortu duen edozein pertsonaia mitologiko.
• Zein da inguruko bati egindako gauzarik ankerrena?
  Nire film laburrak ikusarazi.
• Nola deskribatuko zenuke zure burua hiru hitzetan?
  Uste duzuena baino baxuagoa, pentsatzen dutena baino askoz tontoagoa, ematen duena baino jatorragoa.
• Deskribatu zure bizitza bost hitzetan.
  Bullyinga, prekarietatea, barreak, parranda eta mendia.
• Zuri buruz zer esatea gustatuko litzaizuke hemen ez zaudenean?
  Ane Lindanek tolestutako txapelaren pareko alua zuen.
• Tatuaje bat egin beharko bazenu gaur, zer izango litzateke?
  Anis del Mono etiketa eta Daniel Rabinovich eta Marcos Mundstock-en aurpegiak.