Udako abestirik ba al dugu?

Uda garaia iristen da eta eguneko zein gaueko parrandak ugaritu ere bai. Tabernetan zein txosnetan kantu ugari entzuten ditugu, eta sarritan abesti dantzagarriak eta arinak izaten dira nagusi.

Urte askoan urte bakoitzeko udako kantuak izan ditugu, irratietan eta telebistan sarri-sarri ipintzen zituztenak. Italian sortu zen udako kantuaren fenomenoa, 1964an. Italiako Fonografia Elkarteak lehiaketa bat antolatu zuen talentu gazteak bultzatuko zituen disko bat kaleratzeko asmoz. Neguan egiten zen San Remoko festibalaren arrakasta errepikatzea zen asmoa.

Arrakasta izan zuen eta beste toki batzuetara ere zabaldu zen udako kantuaren joera, Espainiara esaterako. Irrati formulak ere eragin handia izan zuen zabalkundean. 

Azken urteotan, ordea, zaila da udako kantua zein den zehaztea, bakarra hautatzea. Zerikusia izango du streaming plataformak agertu izanak, eta diskoetxeek eta irratiek boterea edo indarra galdu izanak. Lehen abesti komertzial bati babesa ematen zitzaion irratietan eta artista telebistara eramaten zen abestia promozionatzera. Orain, ordea, entzulea edo ikuslea askoz barreiatuta dago, ez gaude denok telebista kate edo saio berari begira, eta ezta irratsaio bera entzuten ere.

Askoz aukera zabalagoa dago, eta, beraz, zailagoa da abesti jakin bat sasoi jakineko puntaren puntako fenomeno bihurtzea. Gainera, estilo dantzagarriko eta izate biziko kantu asko izaten dira orain aldi berean. Arrazoi horiek guztiak tarteko, arrakasta banatu egiten da bat baino gehiagoren artean. Gaur egun TikToken biral egin den bideo bateko abestiak lortzen du askotan zabalkundea. 

Dena den, uda honetan arrakasta izaten ari diren kantuak zeintzuk diren jakiteko asmoz, TOP Gaztearen zerrendara jo dugu. Zer kantu daude lehen hamar postuetan? Bada, hauexek:

1. Mirua - Morroxko
2. Amaia - M.A.P.S.
3. Olaia Inziarte - Ibil hadi argi
4. Ed Sheeran - Sapphire
5. Sabrina Carpenter - Man child
6. Süne eta Veintiuno - Hori bai
7. Sombr - Back to friends
8. Jimena Amarillo eta Hofe - Panpin bat bezala
9. Alex Warren - Ordinary
10. Janus Lester eta Nogen - Bi begi bi lore
    
    Zein da zure ustez 2025eko udako abestia? Kontatu sare sozialetan!