Uda gauak Kutxa Kultur Plazan

Uda ate joka dugu, eta Donostiako Tabakalerako Kutxa Kultur Plazak gau giroak animatuko ditu hemendik irailaren 14ra bitarte. Denetik esakiniko dute; kontzertuak, antzezlanak, dantza, hitzaldiak... guztia, aire librean eta gauez.

Programaren barruan ariko diren musika talde eta bakarlarien artean daude, besteak beste, Filipe Court Band, Silence, The Lucilles, Iker Lauroba, Sunset Reggae Revolutionary Brothers, Dama Beltzak, Latitud 43, Ras Miguel & Tafari eta Ghau. DJ saioak ere izango dira, baita Disko Festa ere, Oihan Vegaren eskutik.

Hain zuzen, #Izanezberdin izeneko programako ekitaldietako bat izango da Disko Festa. Kutxa Kultur Gauen barruan, 14 eta 17 urte bitarteko gazteentzat pentsatutako sei ekitaldi bildu dituzte. Disko Festaz gain, Instagrami eta Youtuberi buruzko Marina Yersen eta Andrea Comptonen hitzaldiak, Comedy Beatbox kontzertua, manga tailer bat, eta DJ saio eta tailer bana egingo dituzte nerabeei begirako programan.

Dantzari dagokionez, Xian Martinezen, Miren Lizeagaren eta Agus Martinezen, Eva Guerreroren, Joana Olasagasti eta Xavi Gonzalezen, Arantza Iglesiasen eta Mug Mus laborategiaren emanaldiak izango dira ikusgai, baita Dantz Festival jaialdia ere. Eta antzerkiari dagokionez, Bocabeats Kabenzotz (ele bitan), Mujer vasca soltera busca (gazteleraz), Anarkia relacional (gazteleraz) eta umorezko antzerkia (euskaraz) programatu dituzte.