Tinderrek ez du soilik ligatzeko balio
Hatzarekin ezker-eskubi etengabe ibili izan zara, zure laranja-erdiaren bila 'Match' egiteko zain? Berdin egiten dute milaka lagunek mundu osoan; datuen arabera, egunero 1.600 milioi aldiz errepikatzen da ezker-eskubi ibiltzeko keinu hori. Tinderrek milaka amodio istorio ekarri ditu, baina app-ak ez du soilik ligatzeko balio.
Montrealeko Unibertsitateak ikertu duenez, app-a erabiltzeko beste modu batzuk ere badira, eta ez diote on handirik egiten aplikazioari. Hiru multzotan banatu dituzte erabilera alternatibo horiek; tabakoaren ala sexu-trafikoaren aurkako kanpainak egiten dituztenak, hainbat produktu saltzeko erabiltzen dutenak (tartean drogak), eta politika kanpainak egiten dituztenak.
Hain zuzen, 2016an AEBetan Bernie Sanders-en aldeko kanpaina arrakastatsua zabaldu zuten ligatzeko app-an; egilea 23 urteko Robyn Gendrich gaztea izan zen. Honek azaldu zuenez, egunean 60 mezu bidaltzen zizkien gizon ezberdinei, eta match egiten zuen bakoitzean, Sanders-en alde bozkatzeko konbentziten saiatzen zen, kontua blokeatu zioten arte.
Produktuak saltzeko joera ere asko zabaldu da app-an; kontua da, askotan drogak direla saltzen dena. Hain zuzen, duela bi urte alarmak piztu ziren Grindr homosexualen ligatzeko app-an drogak saltzen zituzten hainbat profil faltsu deskubritu zituztenean.