The Squid an the Whale (Una historia de Brooklyn/Les Berkman se separent) ***
Kutsu autobiografiko handia du Noah
Baumbach zinema zuzendari interesgarriaren film gazi-gozo honek. Izan ere, bere
gurasoak banandu zireneko sasoia tonu malenkoniatsuz erretratatzen du
zinemagile gazteak bertan. Istorioa 80ko hamarkadan dago girotua, Brooklyn
auzoan. Garai batean arrakasta handiko idazle izan zen Bernard Berkman, baina
azken urteotan ez du eleberri txukunik idatzi. Inspirazioak ez ezik, emazteak
ere abandonatuko du gizona. Dibortzioak Walt eta Frank seme nerabeen bizitzak
astinduko ditu. Komedia eta drama sotiltasunez uztartzen ditu Baumbachek seme
nerabeen ikuspuntu lañotik errodatutako pelikula hunkigarri honetan. Sentibera
bezain samurra, atsegin handiz ikusten da.
