Tartean Teatroak 'Kortxoaren dilema' endredozko thriller politikoa estreinatuko du gaur Bilboko Arriaga Antzokian

Tartean Teatroaren Kortxoaren dilema antzezlana estreinatuko da gaur, endredozko thriller politikoa. Obrak sakontasun handiko gatazka politikoak eta dilema etikoak baliatzen ditu, baina ez da drama, baizik eta komedia politikoa. "Ustekabeak sortzen dira eta egoera bakoitzaren norabidea errotik aldatzen dute, pertsonaiak eta ondorioz ikusleak ere, ezustean harrapatuz. Ezer ez da hasiera batean ematen duena", azaldu dute.

Hau da obraren nondik norakoa: "Irakaslea izeneko pertsonaia, 70 urtekoa, katedratiko jubilatua da, ezkerraren erreferente intelektuala. Pronostiko gaiztoko minbizia dauka, baina sendatzeko aukera sortu da ezustean: aberats ospetsu batek osasun sistema publikoari dohaintzan eman duen erradioterapia ekipamendu batean tratamendua har dezake. Iritzi publikoak goraipatu egin du donazio hau. Bakan batzuk, ordea, zergak behar bezala ez ordaintzeko trikimailua dela salatu dute. Hauen buru, irakasle zaharra. Orain denek galdetzen diote zer egingo duen, bere printzipioekiko leiala izan ala prakak jaitsi. Gaur, bere erabakia publikoki azaldu behar duen unean, Ikasle bat, 60 urtekoa, agertuko zaio ezustean. Aspaldiko kontuak garbitzera dator".

Kortxoaren dilema etika, koherentzia, traizio eta mendekuei buruzko joko teatrala da: "Borroka honetan, bizitza galtzen ez duenak, duintasuna galduko du. Borroka latza eta nahasia izango da, post egia eta fake-en garai ilun honetan, zaila delako bereiztea zer den zinezkoa eta zer faltsua".

Patxo Telleriak idatzi du testua eta Mireia Gabilondok zuzendu du obra. Telleriak bera eta Mikel Martinez arituko dira oholtza gainean. 

Emanaldiak gaur eta bihar izango dira, Arriaga Antzokian, 19:30etik aurrera.