SEXUMATOIA: ZITAL

IBAN BILBAO BARTUREN ‘ZITAL’-EK (BERMEO, 1982) BERMEOKO HITZ ETA ESAMOLDEEI BURUZKO LANA “HACKEATU” ETA HAREN ZABALKUNDEA EGITEN DU. TROLL JARDUNEAN ARITZEA GUSTATZEN ZAIO, SARE SOZIALETAN ZEIN BIZITZA ERREALEAN.

• Zein da zure film erromantiko gogokoena?
  V for Vendetta (James McTeigue, 2005). Idealek 400 urte geroago ere mundua alda dezakete.
• Eta noizbait bero-bero jarri zaituen telesaila?
  Nip/Tuck (Ryan Murphy, 2003) nahiko morbosoa zen.
• Zer da zita batean inoiz esan behar ez dena?
  “Forocoches-en kontua daukat” edota “egunero Wordle-n aritzen naiz”.
• Erradikal eta erromantikoa zarela agertzen da zure Twitter kontuan. Hala al da?
  Bai, baina idealen erromantizismoa da; ba al dago euskaraz hitz egitea baino gauza erradikal eta erromantikoagorik?
• Zein da ligatzeko erabili duzun trikimailurik onena?
  Aitona Ramon Bilbao deitzen zen, eta izen bereko ardoa edaten ari ginela, txantxetan esan nuen nire aitona zela mahastien jabea... eta ttak!
• Bideo-jokoez edota bermeotarrez hitz egiteak balio al du ligatzeko?
  Ezin da bideo-jokoek ematen duten birjinitate ezkutuaren aurkako ligatzeko sorginkeriarik erabili, eta aurpegi honekin ez dago salbatuko nauen euskalki zein baturik.
• App-ak edota sare sozialak ligatzeko erabili al dituzu?
  Nire argazki bat neska bihurtu genuen app batekin, eta ligatzeko app batean mila ‘atsegin dut’ lortu nituen bi ordutan!
• Oheratzeko ‘playlist’-ik badaukazu?
  Musikarik hoberena bikotearen intziriak dira.
• Maniarik ba al duzu oheratzerakoan?
  Ondoren txalo-zaparrada jotzen dut, hegazkinak lurra hartzen duenean ezjakinek egiten duten bezala.
• Inoiz harrapatu al zaituzte jo eta su?
  Bai, lagunek txokoan. CSI-koak argi morearekin agertuz gero, leku hark manifestazio feminista emango luke, eta ni parte-hartze horren zati oso txikia izango nintzateke.
• Larrutan egin duzun lekurik gogokoena?
  Bost izarreko hotel batean. Jacuzzia, ardo ona, eta telebistan Kiko Matamoros eta Belen Esteban mokoka.
• Zein da inoiz egin dizuten proposamenik zoroena?
  Mutil batek bere arreba eta amaren argazkietan masturbatzeko eskatu zidan; eta ez, ez nuen egin.
• Sexuan izan duzun esperientziarik gozagarriena?
  Behin neska-lagun batek garrasi eginarazi zidan, eta Nacho Vidalek zapoarekin baino bidaia-astral zoroagoa sentitu nuen.
• Eta traketsena?
  Neska-lagunarekin larrutan ari nintzela, pisukidea sartu eta Despacito abestia topera jarri zuen. Bertan behera utzi behar izan nuen, kar-kar-kar!