SEXUMATOIA: KLAUDIO LANDA

MILLENNIAL ZAHARRENEK ‘SORGINEN LARATZA’ TELEBISTA SAIO FRESKO ETA GANBERROAREN GARAITIK EZAGUTUKO DUTE KLAUDIO LANDA (EA, 1967), ETA Z BELAUNALDIKOEK, BERRIZ, ‘BASERRIA’ ERREALITATE-PROGRAMA TARTEKO. SEKRETU MAMITSUAK KONTATU DIZKIGU!

• Zein da zure film erromantiko gogokoena?
  Bram Stoker’s Dracula (Francis Ford Coppola, 1992). Bukaeran negar egin nuen eta ez zait sarritan gertatzen.
• Eta noizbait bero-bero jarri zaituen telesaila?
  V (Kenneth Johnson, 1984). Bero-bero jartzen nintzen Donovan izeneko pertsonaiarekin, ufa!
• Nolakoa izan zen zure lehen musua?
  Ez dakit lehena izan zen, baina udan Alemaniako Hanburgotik herrira iritsi zen mutil zoragarri bati eman nion gaztetan. Sexuz beteriko musu luzea izan zen.
• Zer da zita batean inoiz esan behar ez dena?
  Ez da komeni bikotekide ohiari buruz hitz egitea.
• Zer da lehen begiratuan erakartzen zaituena?
  Sudurra eta ipurdia. Sudur luzeak dira gehien gustatzen zaizkidanak. Ipurdiak, ordea, txikiak eta sendoak.
• Hitz-jario handikoa izanik, balio izan al dizu ligatzeko?
  Egia esan, okerrerako izan da. Batzuetan baliagarriagoa izan da isilik egon eta begirada pare bat botatzea.
• Telebistan agertzeak lagundu ala kalte egiten du ligatzeko?
  Ez dakit, agian ligatzeko aukerak baldintzatzen ditu. Lehen zitan telebistari buruzko galdera asko egiten dizkidatenean ez dit grazia handiegirik egiten.
• App-ak edota sare sozialak ligatzeko erabili al dituzu?
  Aurrez aurrekoak nahiago ditut. Tarteka sare sozialak edota aplikazioak erabili izan ditut.
• Zer menu prestatuko zenuke lehen zita batean?
  Pikatzeko zerbait: urdaiazpikoa, patea, pintxoak... Ez zait mahai inguruan luzaroan eserita egotea gustatzen, eta lehen zita batean kozinatzea baino gauza garrantzitsuagoak daude.
• Ligatzeko ‘playlist’-ik badaukazu?
  Ez. Dena den, ligatu ondoren, mutil horri gustatzen zaizkion kantak gorde eta noizean behin bera gogoratzeko entzuten ditut.
• Zein da zurekin oheratzeko hobekien funtzionatu duen esaldia?
  “Bagoaz?”.
• Maniarik ba al duzu oheratzerakoan?
  Galtzerdiak jantzita ohera sartzen denari kentzeko esan behar izaten diot.
• Etxeko zein txoko da zuretzat onena sexurako?
  Edozein, dutxan izan ezik... arriskutsua da!
• Inoiz harrapatu al zaituzte jo eta su?
  Azkena hotel batean izan da; gela garbitzera zetorrena, abisatu gabe, ohea zegoen tokiraino sartu zen. Ez zen etenaldi luzea izan, garbitzaileak alde egin eta guk gurean jarraitu genuelako.
• Zein da zure fantasiarik zoroena?
  Lau pertsona baino gehiagorekin batera egitea.
• Sexuan izan duzun esperientziarik gozagarriena?
  Bartzelonan ezagutu nuen mutil baten etxean izandakoa. Ez dut sekula ahaztuko!