Piraten 5. Musika Lehiaketaren finalerdiak prest dira

Piraten 5. Musika Lehiaketaren finalerdiak prest dira https://www.gaztezulo.eus/albisteak/piraten-5-musika-lehiaketaren-finalerdiak-prest-dira/@@download/image/2012687449pirata_musika_lehiaketa.jpg
2012/12/13
berria
Lehiaketara aurkeztu diren 25 taldeen artean bederatzik igaro dute lehen hautapen proba, eta finalerdietara iritsi dira. Horretarako, datozen hiru asteburuetan kontzertuak eskainiko dituzte Donostiako hiru aretotan, eta epaimahaiaz gain, ikusleek ere aukeratu ahal izango dute beren talderik gustukoena. Garaileek Aste Nagusiko Piraten Egunean oholtza gainera igotzeko aukera izango dute.


Donostiako Piratek antolatzen duten Musika Lehiaketaren 5. edizioa da aurtengoa, eta urtez urte izandako joerari jarraiki, aurten ere ohi baino talde gehiagok eman dute izena. Orotara 25 izan dira, eta epaimahaiak lehen aukeraketa egin du dagoeneko: Donostialdeko bederatzi talde dira.

Orain finalerdiak egin behar dituzte. Ekainaren 8an, 15ean eta 22an izango dira, Intxaurrondoko Letaman gaztetxean, Groseko Kortxoenea gaztetxean eta Añorgako Zine Zaharrean, hurrenez hurren. Dena den, talde bakoitzak horietako batean jotzeko aukera izango du, ez denek hiruretan.

Irabazleak bi modutara aukeratuko dira. Batetik, kontzertuak ikustera hurbiltzen diren ikusleek boza emateko aukera izango dute, eta hortik irtengo da lehen taldearen izena. Bestetik, epaimahaiak beste bi talde hoberenak hautatuko ditu. Orotara, beraz, hiru taldek izango dute Donostiako Aste Nagusian, Piraten Egunean, jotzeko aukera.

Finalerdiak


Lehenengo finalerdia
Non: Intxaurrondoko Letaman Gaztetxean
Noiz: Ekainaren 8an, ostirala, 20:30ean
Taldeak:
    Margot donostiarrak, pop/rocka egiten dute
    Tacumah Reggae Band donostiarrak, reggae musika egiten dute

Bigarren finalerdia
Non: Groseko Kortxoenea Gaztetxean
Noiz: Ekainaren 15ean ostirala, 20:30ean
Taldeak:
    Behatxeroja hernaniarrak, punk rocka jotzen dute
    On donostiar rockeroak
    The Amendoins donostiarrak, rock musika egiten dute

Hirugarren finalerdia
Non: Añorgako Zine Zaharrean
Noiz: Ekainaren 22an, ostirala, 20:30ean
Taldeak:
    Flattened Frogs Massacre urnietarrak, hardcore/metal estilokoak
    Hilotz lasartearrak, thrash metalaren maisuak
    Morphina donostiarrak, rock musikariak
    Saia oiartzuarrak, nu-metal estiloa jotzen dute

Kuadrilen eguna


Larunbat honetan, gainera, —ekainak 9— koadrilak berotzeko eguna antolatu dute Donostiako Piratek Antiguo auzoan. Koadrila bazkaria, jolasak, musika eta sorpresak ez dira faltako. Zoaz ongi pasatzera!