Mintzapraktikak online

Mintzapraktikak online https://www.gaztezulo.eus/albisteak/mintzapraktikak-online/@@download/image/20121256029sare_1360142822.jpg
2012/12/05
erreportajea
Testua: Egoitz Gonzalez @aldakur
Euskara edota ingelesa ikasten ari direnei zuzendutako web aplikazioa da Babelium project –www.babeliumproject.com–, ahozkotasuna lantzera bideratua. Euskaltegiek eta hizkuntza eskolek badarabilte dagoeneko. 

Hizkuntza bat ikasten hasten garenean, papera eta boligrafoa izaten ditugu bidelagun edo tresna nagusi, eta ahozkoa alboratu egiten dugu maiz. Gurean euskaraz aritzea errazagoa izan daiteke (ez beti, tamalez) kalera irten eta koadrilakoekin edo mintzalagunekin elkartuz gero, edo tabernetan nahiz dendetan euskaraz eskatuz gero. Ingelesez hitz egiteko solaskideak topatzea, ordea, konplikatuagoa da eta askok atzerrira jotzen dute hutsunea betetzera.
Gabezia horri berari beste erantzun bat eman ahal izango diogu hemendik aurrera: Euskal Herriko Unibertsitateko Informatika Fakultatean sortu duten Babilum Project web aplikazioa.

Arestiko webgune horretan izena emanda, erabiltzaile izena, pasahitza eta, beraz, sisteman sartzeko baimena eskuratuko du erabiltzaileak eta, aurrerantzean, hainbat baliabide edukiko ditu aukeran.

Batetik, ahozkotasuna lantzeko eta praktikatzeko zenbait bideo ariketa, Babelium Project-en garatzaileek eta hainbat eskoletako irakasleek igo dituztenak. Fitxategi interaktiboak dira, hau da, ikaslea bideoa ikusten hasiko da eta, momentu batean, gezi gorri batek hala adierazten duenean, bideoan parte hartzeko txanda heldu zaiola ohartaraziko dio sistemak. Orduan, web kameraren edo mikrofonoaren bitartez, bideoak eskatutakoari erantzuten hasi beharko da erabiltzailea, beti ere denbora tarte zehatz baten baitan. Hau agortuta, bideoak aurrera jarraituko du eta, horrenbestez, elkarrizketa interaktibo bat eratuko da. Bestalde, hizkuntza eskola ofizialetan usu erabiltzen dituzten ariketez osatutako ikus-entzunezkoak ere badaude eskura. Alegia, pantailan hainbat irudi agertuko dira eta erabiltzaileak proposatzen zaion gai horren inguruan hitz egin beharko du hainbat minutuz.

Saio hauek guztiak grabatu egiten ditu sistemak eta, honenbestez, posible da Babelium Project-en bigarren zatiari heltzea, ebaluazio kolaboratiboari, hain zuzen. Izan ere, guk grabatutako bideo eta audioak beste erabiltzaileek ebaluatuko dituzte, gure gabezia eta akatsak lehenago identifikatu eta zuzendu ahal izateko. Ebaluazio sistema hau elikatzeko prozesua honakoa da: erabiltzaile bakoitzak hainbat kreditu edo puntu jasotzen ditu sisteman lehen aldiz sartzearekin batera. Beste ikaskideei bere bideoak ebaluatzeko eskatzen dien bakoitzean kredituak galduko ditu eta, puntu gehiago lortzeko, bera bezalakoen bideoak ebaluatu edo bideo ariketak igo beharko ditu. Funtzionamendu honekin, sistemaren osasuna mantentzen da.

Jakina, egokia ez den bideo bat aurkituz gero, hau salatzeko aukera dago, ahalik eta azkarren sistematik kanporatua izan dadin. Azken batean, horixe da Babelium Project honen indargune nagusia, denon parte hartzetik elikatzen dela eta, era berean, denon parte hartzeari esker ikas dezakegula.

Etorkizunean, frantsesa ere sartuko dute eta dagoeneko garatzaileak lanean ari dira tablet eta smartphonetan ere erabilgarria izan dadin. Aipagarria da, bestalde, aplikazioaren lizentzia askea dela: GPLv3 hain zuzen ere.

HARRITU GAITU


Android euskaraz
Googlek, ofizialki, ez du babesten Android sistema euskaraz izateko aukera. Baina Sarean lan talde bat sortu da, sistema eragilea euskaratzeko eta Googleren babesa lortzeko.

KATXONDOENA


Kinodok
Zinema ohikoa ez den ikuspuntu batetik begiratuta. Blog hau ikus-entzunezkoen mundutik datozten lau profesionalek sortu dute, eta beraien proiektuak jorratzeko jarraitzen duten bidea argitaratzen dute pausoz pauso. Interesgarria.