Lehen sorospenen ikastaroa antolatu du DYAk

Gipuzkoako DYAren eskutik, lehen sorospenen oinarrizko ezagutzei buruzko ikastaro teoriko-praktikoa egingo dute otsailaren 27tik martxoaren 16ra. Edozien pertsonak eman dezake izena, baina leku mugatuak daude. Ikastaroa egindakoan, Sorospen Titulua eskuratuko dute parte hartzaileek, eta EHUko ikasleek bi kreditu jaso ahal izango dituzte.

---

Ikastaroaren helburua eguneroko arrisku egoera nagusiak ekiditeko baliabideak ematea da. Besteak beste, bihotza eta birikak suspertzen, zauriak sendatzen, hausturak konpontzen, erredurak zaintzen, eta beste hainbat kasuri nola aurre egin erakutsiko dute DYAko erizain, mediku eta monitoreek.

Funtsezkoak eta erabilgarriak diren ezagutzak era erraz eta entretenigarriak emateko, gai teorikoak praktikoekin txandatzen joango dira. Gainera, lehen sorospenez gain, sorosle izateko prestakuntza ere emango zaie parte hartzaileei.