Labe barruan egosteko prozesuan dauden proiektuak dastatzeko prest?

MADELEINE

SUKALDARIAK: Jagoba Salvador (baxua), Iñaki Benito (bateria jotzailea), eta Itzal Uranga eta Gartxot Unsain (gitarra eta ahotsak).

EGOSTE DENBORA: Diskoa amaitzeko falta zaien zatia uztailean grabatuko dute Zestoako Gaztain estudioan Eñaut Gaztañagarekin batera. Lana iraila-urria inguruan kaleratuko dute.

OSAGAIAK: Lau lagun eta sekulako ilusioa osagarriak irabiagailu batean sartuz gero, bertatik Madeleine irtengo litzateke. 2008an jaiotako talde honek, bidean kontzertu mordoa eta argiz eta kolorez beteriko bi lan paregabeen haziak utzi dituzte. Orain, ereitea tokatzen den honetan eta disko berriaren lehen kantuaren bideoklipa ikusi ostean –Inongo garen–, erraz konformatzen ez den talde horietako bat bilakatu dela ohartuko zara.

ERREZETA: Hamar urte beteko dituzte elkarrekin eta musikalki ere heldutasunera iritsi direla frogatu nahi dute. Bakoitzaren gustu musikal eklektikoak bateratu eta abesti biribilagoak eginez, lan mamitsuago bat osatzeko helburua dute. Urteurrena aprobetxatuz gainera, sorreratik itsatsia eraman duten post-rock generoaren etiketa horrekin ere apurtu nahi dute.

ZAIN

SUKALDARIAK: Sukaldari nagusia Pello Gutiérrez dugu eta aktore lanetan, aldiz, Javier Barandiaran eta Ainhoa Alberdi dabiltza.

EGOSTE DENBORA: Film labur honen errodajea 2017ko abenduan amaitu zuten eta kolorea eta soinuari azken ukituak ematen ari dira une honetan. Dena ondo bidean, urte amaieran izango da ikusgai.

OSAGAIAK: 2015. urtean Pikadero filmaren lorratzari jarraituz, koloreak eta enkoadraketak interpretazio lehor eta soil batez lagunduak, zinema nordikoa eta Kaurismaki zuzendariaren munduan oinarritzea izan dute helburu. Europa iparraldeko hainbat zuzendarik hain berezkoa duten estilo propioaz baliatu dira lan honetan: pertsonaia bitxiak, irrealak diruditen kokalekuak eta plano estatikoak. Guztia umore hotza eta dramaren arteko marra ikusezin batez lotuta. Horrez gain, Dreyer edo Haneke zinegileak eta Adrian Tomine eta Andreas-en komikigileen estetika eta estiloaren zantzurik ere igarriko dituzu.

ERREZETA: Komedia musikal triste minimalista bezala definitu daiteke lan hau, nahiko narratiboa den arren, minimalismoaren leiho berriak ireki nahi izan dituelako batik bat. Musikaren arloa ere nabarmentzekoa da, Xabier Leteren Ni naiz kantua baitago filmaren oinarrian, Muskulo taldearen zuzeneko bertsioan. Izan ere, musika taldea filmaren protagonistak izango dira Javier Barandiaran eta  Ainhoa Alberdi aktoreekin batera.

SONAKAY

SUKALDARIAK: Jonatan Camacho (ahotsa), David Escudero eta Ramón Vélez (gitarra jotzaileak), Jose Luis Jiménez (baxua) eta David Bernárdez (perkusioa).

EGOSTE DENBORA: Sonakay Denontzat izeneko diskoa grabatzeko, joan den maiatzean Mutrikuko AME grabaketa estudioetan murgildu ziren zen eta urte amaieran aterako dute labetik.

OSAGAIAK: Euskal abesti ezagunei flamenko ukitua txertatzea maniobra arriskutsua denik ez duzu ukatuko. Baina Sonakay taldekoek, hitzez-hitz ezagutzen ditugun melodia horiei ukitu fresko eta urratzaile batez bustitzea lortu dute inongo ezbairik gabe.

ERREZETA: Got Talent 2018 saio ezagunean, Mikel Laboaren Txoria txori kantaren bertsio flamenkoa abestu ostean, sekulako arrakasta lortu du taldeak. Abesti horren moldaketa disko berrian jasoko badute ere, ez da euskal musikaren erreferentzia bakarra izango, Benito Lertxundiren Loretxoa eta Urkoren Lehenengo ikasgaia abestiak ere bilduma horren osagarri bilakatuko baitira.