Kontzertuak eta musikarekin lotutako hainbat ekintza izango dira egunotan Gernikako Lekuek Festibalean
Testua: Maitane Legarreta Etxezarreta
@mailegetx
Joan den asteburuan eman zioten hasiera Gernikako Lekuek Festibalari, baina oraindik ere hainbat jarduera egingo dituzte larunbatera bitarte. Musikari lotutako ekitaldiak izango dira: tailerrak, zinea, kontzertuak...
Gaur, hilak 16, Zure musikaren alde ez musikala ezagutu hitzaldia egingo dute, Arima Means Soul-en eskutik, Astran. Jarraian, 21:00etan, Empty files taldearen kontzertua izango da.
Bihar, osteguna, Summer of soul dokumentala eskainiko dute 19:00etan, Lizeo Antzokian. 21:00etan, berriz, John Duer & The Blues Freaks-ek joko du, Iparragirren.
Astebururako antolatu dute egitaraurik potoloena. Ostiralean Crock of gold dokumentala emango dute, 19:00etan, Lizeo antzokian. Musikarik ere ez da faltako herriko hainbat gunetan goizaldeko ordu txikietara arte: Naz, Gailu eta Za!, Quiet Guest DJ, Seiurte, Against You eta Skakeo, Kska DJa eta beste zenbait disko-jartzaile.
Larunbatean Kalapitaka rock tailerra izango da eguerdian, udal liburutegian, eta Arkalo eta Bor DJak, Arranon ordutebete geroago. Swingtxaku klandestinoa antolatu dute, kaleetan barrena, 13:00etatik 16:00etara. Ondoren, mikro irekia eta pintxada egingo dute, Pasilekun. Iluntzetik gauera ere musika izango da nagusi: J Martina, Merina Gris, Dupla eta Gora etorri, Astran; Giudi e Quani eta Acid Mess, Iparragirren; Urko, Arros eta Gerekiz DJak, Aterpen; DJak, Labelen; Quiet Guest DJa, Caminiton; eta Addar, Kult Parnasoan. Gaua DJ Argi-rekin amaituko dute, Lagun Etxean.
Aste osoan zehar Sinestesika erakusketa izango da Astrako lehenengo solairuan. 16:30etik 20:30era egongo da zabalik.
