Klimt ***

Laudatua bezain laidoztatua, zinema garaikideko sortzailerik berezienetakoa da Raul Ruiz txiletarra. Kasu honetan, eszenaratze irudimentsu eta apurtzaile bat oinarri harturik, onirikotasunez melatzen du film osoa Genealogies d’un crime interesgarriaren egileak. Gustav Klimt pintore austriarra heriotzaren zain dela, bizitzako pasadizorik esanguratsuenak ekarriko ditu gogora. Besteak beste, Emilie Floge-ren maitasun platonikoa, Lea de Castro dantzariaren sexu pasioa eta zentsurarekin bizi izandako tirabira garratzak. Melies zinemagileak ere leku izango du artistaren oroitzapenetan. Klimtek pinturetan islatu zuen sentsualitateaz blai daude Ruizen fotogramak. Film interesgarria da, baina ikusle arrunta asper lezake.