KLASIKOAK ASTINDUZ: Hamaika bitxikeri eta burezurren misterio bat

Dagoeneko txoko honen bosgarren sarrera dugu! Ospatzeko, gaurkoan musika klasikoarekin lotutako hamaika bitxikeri eta garezurrekin lotutako istorio ilun bat ekarri dizkizuet. Orain artekoa galdu baduzu, aurreko ataletan musika klasikoa definitzen saiatu ginen emakumeen presentzia ia anekdotikoa salatu genuen, musika apur bat entzuten hasi ginen klasikoetan klasikoenak deskubrituz, eta azkenik, musika koralaz eta ahotsaren indarraz hitz egin genuen.

Gaurkoan bada, klasikoen munduko sekretu eta eskandaluak aireratuko ditugu; historiako melodia ezagunenak konposatu dituzten egileak santu batzuk zirela uste zenuen soilik ileordea zeramatelako, ala? Ezta gutxiago ere! Musika klasikoaren urrezko historiak baditu bere alde ilunak, batzuk sinestezinak irudituko zaizkizun arren. Hasteko prest?

Hasteko, jakin musika klasikoa definitzen duten pieza esanguratsuenen konpositore asko rock izarrak bailiran bizi izan zirela; drogak, sexu eskandaluak, diru zorrak, osasun arazoak (fisikoak eta mentalak)... ikusi ikusi!

• BEETHOVEN, txikizioak egiten aditua: Nahiko jakina da Europako Ereserkiaren konposatzaileak jenio bizia zuela, gehienbat bere gortasunak eraginda; beharbada horren ezaguna ez dena bere haurtzaroak izaeran eragin handia izan zuela da. Beethoven ume prodijioa izan zen; bere aitak gogor irakatsi zion musikari ofizioa. Alkoholikoa eta indarkeriara emana, konpositorearen aitak Ludwig txikia Mozart berria izan zedila nahi zuen. Mundutik isolatu zuen guztiz, bere izaeran harremanetarako arazo larriak eraginez; heldutan, Beethovenek hira atakeak izaten zituen. Bazenekien konposatzailea 70 aldiz aldatu zela etxez atake horietan etxebizitzak txikitzen zituelako?

• MOZART, umore eskatologikoaren errege: Bazenekien Mozart eta Beethoven elkar ezagutzera iritsi zirela? Mozartek klaseak eman zizkion Beethoven txikiari, eta diotenez, etorkizunean "jenio handi bat" izango zela adierazi zuen. Mozart ere ume prodijioa izan zela badakigu, eta Beethovenen antzera, bere gurasoek "erabili" egin zuten musikari bikaina bihurtu zedin. Baina Mozartek ez zuen sekula bere haur izpiritua abandonatu, eta bihurrikeriak nonahi egiten zituen. Hain zuzen, umore eskatologikoa maite zuen Mozarte; entzun bere Leck mich im arsch pieza bikaina! Alemanieraz ez dakizuenontzat: "Miazkatu iezadazu uzkia". Halakorik ziur ez zenutela espero!

• BRAHMS, maitale sekretua: Musika erromantikoaren erregeak bazekien erromantzisimo hori beste eremuetara zabaltzen, eta hala, musika klasikoaren "kulebroi" ezagunenaren protagonista bilakatu zen Brahms. Gaztetatik, Brahms-ek Robert Schumann eta bere emazte eta konpositore Clara Schumannen babesa jaso zuen, baina beren harremana ez zen horretan gelditu; Brahms eta Clara maitale bilakatu ziren sekretuan. Beren harremana sekretuan mantendu zuten, eta Robertek ez zuen sekula jakin; 1856an hil zenean beren harremanarekin jarraitu zuten, baina ez ziren sekula ezkondu. 

• TXAIKOVSKI, homosexualitatea eta suizidioa:  Beharbada ez zenekiten, baina errusiar musikaren konposatzaile garrantzitsuenetakoa homosexuala zen. Irudikatu une batez nolakoa izan behar zuen homosexuala eta konposatzaile ezaguna izatea XIX. mendeko Errusian; Txaikovskik bizitza osoa igaro zuen bere homosexualitatea ezkutatzen eta emakume batekin (Antonina Miliukova bere ikasleetako bat) ezkontzera ere iritsi zen. Txaikovskik asko sufritu zuen, eta hainbatetan saiatu zen bere buruaz beste egiten; behin, biluzik bota zuen bere burua Moscova ibaira. Bere heriotza suizidioa izan zela esan daiteke; San Petesburg-en kolera epidemia bat zabaldu zen bera bertan zenean, eta egosi gabeko ura edaten hasi zen gaixotasuna bereganatu eta hil arte. 

• LISZT, The Beatles baino fan gehiagorekin: Lisztek sekulako fan taldea zuen, rock izar baten antzera. Bere izaera ere halakoa zen; harroputza, histrionikoa eta oso antzerkira emana. Egun bizi izan bazen, milaka jarraitzaile izango zituen bere sare sozialetan! Emakumeak txoratuta zituen, eta bere objektuak eskatzen zizkioten, batez ere ile-sortak. Lisztek droga pila probatu zituen gainera, besteak beste, Datura fastuosa izeneko landare haluzinogenoa. 

• HAYDN eta burezurren misterioa: Azkenik, misterio bat! Bazenekiten Josep Haydn konpositorearen hilobian bi garezur daudela?Phrenologistsek jatorrizko burua lapurtu eta beste bat jarri zuen hilobian; 1954ean jatorrizkoa berreskuratu zuten, baina bi burezurrak elkarrekin lurperatzea erabaki zuten.