Joseba Sarrionandia, Habanan irakasle

Joseba Sarrionandia idazleak Etxepare Institutuaren Euskara eta Euskal Kultura irakurletza programa akademikoaren edukia zehaztu eta irakatsiko du Habanan. Irakurletza azaroaren 22an abiaraziko da, "Euskara hizkuntzaren historia" izenburu duen ikastaroari hasiera emanez. Euskara hizkuntzaren historia lexiko-gramatikala eta soziala izango ditu aztergai, Neolitikotik hasi eta gaur egunera arte.

Programa akademikoaren hasiera honetan beste hainbat ekintza dituzte aurreikusita: abenduaren 5ean Asier Altunak "Amama" aurkeztuko du unibertsitatean, eta filmaren emanaldia eta gero euskal baserri tradizionalaren bilakaeraz bertaratutakoekin aritzeko  aukera izango du. Abenduaren 15ean, berriz, EHUko irakasle Mari Jose Olaziregi, azaroa bitartean Etxepare Institutuko Euskara Sustatu eta Hedatzeko zuzendaria izan dena, euskal literaturaz ariko da "Un viaje por la cultura y la literatura vasca" hitzaldian.

Udazkenerako beste hainbat adituren mintzaldiak ere antolatzen dihardute; hala nola, Blas de Oterok Habanan eman zituen lau urteen gainekoa, edota Jose Antonio Agirre eta euskal exilioa Kuban aztertuko duena.

Ikastaroaren inguruko informazio guztia Etxepare Institutuaren webgunean.