Itziar Ziga: Euskal Herria birputifikatzearen aldeko manifestua

Itziar Ziga: Euskal Herria birputifikatzearen aldeko manifestua https://www.gaztezulo.eus/albisteak/itziar-ziga-euskal-herria-birputifikatzearen-aldeko-manifestua/@@download/image/itziar_ziga_1369060007.jpg
2012/06/01
erreportajea
Testua: Samara Velte
Sexu askatasunaren aldeko eguna dugu hil honen amaieran, ekainaren 28an. Manifestazio koloretsuek okupatuko dituzte kaleak, eta aldarrikapenek festa eta musu itxura hartuko dute; hain zuzen ere, nahi dugun eran gozatzeko eskubidea dugula aldarrikatzeko eguna izango baita ekainaren 28a.


Erantzitako kuleroak banderatzat hartuta, gozamenaren aldarri ozena egiten du Itziar Zigak (Errenteria, 1974) ere. Iaz argitaratu zuen Sexual Herria (Txalaparta, 2011), eta bertan argi azaldu du bere tesia: ez da egia Euskal Herrian ez garela sexuzaleak. Gertatzen dena da kolonizazio espainiar eta katolikoak (ez du frantsesaz ezer esaten) lehorte izugarria eragin duela Euskal Herriko harremanetan.

Iritzi politikoki ez zuzenak, argudio lotsagabeak eta hizkera zirikatzailea darabiltza Zigak. Ez du ofizialki "errespetagarria" den horretan sartzeko batere asmorik; ez dauka ezer "garrantzitsua" esateko prententsiorik. Historia nahieran manipulatzen du bere tesiak arrazoitzeko, eta baita hori modu agerian adierazi ere. Janzkera deigarria du, ofizialki "gustu onekoa" den horretatik guztiz kanpo; liburu aurkezpenetan garagardoa hartzen du (gutxienez). Kritika ageria egiten dio autozentsuran eta faltsukerian oinarritutako gizarteari, eta gozamena aldarrikatzen du beste ezeren gainetik.

"Euskal Herrian oso putak gara", esan du ikasketaz kazetari, iritzi politikoz feminista eta bokazioz puta den Zigak, Bartzelonan bederatzi urtez sexbestean egon ondoren. "Gudariaren mentalitatetik, putaren mentalitatera"; horixe egin beharreko bidea. Gozamenak ez baitu konpromisorik eza esan nahi: "Euskal Herria birputifikatzea baino ez zaigu falta".

Bibliografia


• Un zulo propio (Melusina, 2009)
• Devenir perra (Melusina, 2010)
• El genero desordenado (Egales, 2010)
• Sexual Herria (Txalaparta, 2011)
• Glamur i resistencia (El Tangram, 2011)