Irundik pasatzen diren migranteei ahotsa ematen dien 'Harresi ikusezina' podcasta argitaratu dute

Egunero Irundik pasatzen diren migranteen testigantzak jasotzen dituen Harresi Ikusezina podcasta estreinatu du gaur EITBPodkast atariak. Cristina Tapia Huici kazetaria da gidaria eta Europarako bidean Gipuzkoa zeharkatzen duten migratzaileen egoera jorratuko du Ulu Mediak ekoiztutako sei ataleko podcast dokumentalak.

Atal horien helburua migranteen errealitatea entzuleei hurbiltzea da, eta, horretarako, hainbat pertsonaren testigantzak bildu dituzte: adituenak, boluntarioenak, eta, batez ere, protagonista diren migranteenak. Horretaz gain, mugaren historia errepasatu eta hainbat gai jorratu dituztela ere azaldu dute, hala nola "Europak eskaintzen dituen eskubideak, kutsu arrazista duten polizia-kontrolak, Iparraldean eta Hegoaldean sortutako harrerako herri-mugimenduak, eta Irundik igaro diren, eta orain Hendaian eta Parisen bizi diren pertsonen istorioak".

Honako hauek parte hartu dute, besteak beste, podcastean: Iker Barbero eta Rosa Arburua (EHUko irakasleak), Koldo Nagusia (Antxeta Irratiko kazetaria), Gari Garaialde eta Josune Mendigutxia (Irungo Harrera Sareko boluntarioak), Kristin Artola (Bidasoa Etorkinekin boluntarioa), Amets Arzallus (bertsolaria eta idazlea), Jean Marc Lavigne (Hendaiako apaiza), Francisco Rodriguez (abokatua), Ilona Cook eta Alice Bertrand (Parisko Utopia elkarteko boluntarioak), eta bizitza duin baten bila haien etxeak utzi zituzten Ali Akla, Idrissa Fofana, Bama Lasana eta Fadiga Barbajan.

Cristina Tapia Huici arduratu da zuzendaritzaz, ekoizpena, gidoiaz eta itzulpenez. Xabier eta Martin Etxeberria anaiak ere aritu dira gidoigintzan. Juan G. Andresek eta Oier Aranzabalek, berriz, grabazioa, edizioa eta soinu diseinua izan dute eskuartean. Bieuse elkarteak lagundu du bikoizketekin, Eider Eibarrek egin du arte lana, eta Willis Drummond  taldearena da sintonia.

Oraingoz lehen atala kaleratu dute eta lehena zein gainerako bostak jatorrizko bertsioan (narrazioa euskaraz eta testigantzak euskaraz, gaztelaniaz eta frantsesez) zein bikoiztuan (narrazioa euskaraz eta testigantzak euskarara bikoiztuta) entzun ahal izango dira.