Hiru idazleren liburuak itzultzeko deialdia
Literatura Unibertsala bilduma osatzen jarraitzeko, bigarren deialdia antolatu du EIZIE elkarteak. Hiru idazleren lanek osatzen dute deialdi hau: Leonardo Sciacia-ren Todo Modo, Amos Oz-en Michael Sheli eta Marina Tsvetaieva-ren Mon frère féminin: Lettre à l'amazon.
Itzultzaile profesionalek zein hasiberriek parte har dezakete deialdian eta itzuli beharreko hiru obren laginak jarri dituzte eskuragai. Obra baterako baino gehiagorako laginak aurkez daitezke.
Lehiaketan parte hartzeko testuaren itzulpena -lau kopiatan- bidali beharko da, ezizen batekin. Horrekin batera, gutun-azal itxi baten barruan, itzultzailearen datuak adieraziko dira, eta ezizen bera errepikatu gutun-azalean. Lanak EIZIE elkartearen Donostiako egoitzan aurkeztu beharko dira irailaren 23a baino lehen. Postaz edo mezulariz bidaliz gero, Literatura Unibertsala lehiaketarako dela adierazi behar da gutun-azalean.
EIZIE elkartearen webgunearen bidez jakinaraziko da epaimahaiaren erabakiaren berri. Esleituak izan diren proiektuen itzultzaileei zuzenean jakinaraziko zaie.
Informazio gehiago nahi izanez gero, hemen jaso dituzte xehetasunak.