Hamar ordu baino gehiago eserita egoteak osasunean duen eragina

Ordenagailuaren aurrean lan egiten dugunontzat egunaren ordu gehienak eserita igarotzen ditugu; gutxienez 8 ordu egin ditzakegu pantailari begira, eta gehienetan, eserita igarotzen dugun denbora ez da hor eteten. Etxera iritsi, eta egunero igaroko ditugu ordu batzuk sofan eserita, telebistari so, bideo-jokoekin jolasten, ala besterik gabe irakurtzen edo mugikorra begiratzen.

Gizartearen gehiengoak hamar ordu baino gehiago igarotzen ditu eserita egunero-egunero, eta horrek sekulako inpaktua du osasunean. Eragin zuzenetako bat bizkarreko mina izaten da; lunbagoa, ziatika... bazenekien lunbagoa dela baja medikua eskatzeko arrazoi errepikatuena? Honek badu zentzua, izan ere, gure gorputza ez dago diseinatuta horrenbeste orduz eserita egoteko, mugimenduan egoteko baizik. Hala, gure bizkarrezurra gorputzaren pisuari eusteko diseinatuta dago, eta ordu asko eserita igarotzen ditugunean, lunbarrak gehiegi kargatzen ditugu. 

Ordu luzez eserita egotearen beste gaitz nagusietako bat loditasuna da. Geroz eta gutxiago mugitu, orduan eta gorputz masa handiagoa izango dugu. Honek, era berean, beste hainbat gaitz ekarriko dizkigu, esate baterako sindrome metabolikoa (diabetesa adibidez), bihotzeko gaitzak eta presio arterial handiagoa. Dakizuenez, obesitatea da munduko pandemiarik zabalduena egun, eta haurrei bereziki eragiten diena gainera. 

Sedentarismoa estuki lotuta dago heriotza goiztiarrarekin; osasun fisikoa kaltetzeaz gain, osasun mentalari ere eragiten dio, gure adimena ez dagoelako egun guztia pantaila bati begira egoteko diseinatuta. Itxialdiak nabarmen areagotu ditu gaitz horiek.

Egunean ordubeteko kirola egiteak sedentarismoaren ondorioak apaldu ditzake, baina kontuz, kirola egiteak ez du esan nahi sedentarioak ez garenik. Ezer gutxirako balioko digu ordubeteko gimnasioak gainontzeko 23 orduak geldi igaroko baditugu. Orduan, zer egin dezakegu? Bada ahalik eta gehien mugitu: lanera joaterakoan saiatu ibiltzen ala bizikletan joaten, tarte batean bada ere; etxeko eskailerak erabili, ahaztu igogailua; asteburuetan plan aktiboak antolatu; txakurra baduzue, egin pasio luzeagoak; eguna kirol apur bat eginez hasi; erabili mugikorra ala smartwatch-a pausoak kontatzeko; eta orokorrean, mugitu ahal bezainbeste!