[Gomendioa] 'Olive Kitteridge': ahanzturan eroritako maisulana

Olive Kitteridge, Maine estatuko kostaldeko herri txiki batean bizi den fikziozko pertsonaiaren 25 urteko istorioa ardatz duen telesail-motza. Istorioa, herriko institutuko matematika irakaslea den adin ertaineko emakume bat delarik hasten da, Henry farmazialariarekin ezkondua, biak, bere seme Christopherekin batera bizi direnean, eta bere zahartzaroraino iristen da.

Ordubete baino gutxiagoko lau ataletan banatutako ekoizpenak modu kostunbristan erakusten digu emakume horren, haren familiaren eta auzokide batzuen bizitza. Generoa dramatikoa dela esango nuke argi eta garbi, bizitza arruntez diharduen arren, hemen aurkezten zaiguna askoz ere dramatikoagoa delako. Telesail honek duen umore eskasa beltza da, batez ere Kattiridge pertsonaia nagusiaren nortasunak eragiten duenean, bertutedun emakumea, baina lagunak egiteko jaio ez dena. Soiltasun horren azpian ordea, sentimenduen zurrunbilo etengabea topatuko duzu: emozioa, ironia, samurtasuna eta abar. Frances McDormand aktore bikainari esker iristen zaizkigu emozio-printza horiek, izan ere bere gizatasunak eta jenio biziak pantaila zeharkatzen baitute.

Lagin bat:
- Esan al diezadakezu arrazoirik goizetan jaikitzeko?
- Sentitzen dut, baina ez zait ezer bururatzen. Izan ere, txakurra noiz hilko zain nago, neure buruari tiro bat emateko.

Miniserie bikaina, paregabea, garratza, iluna, tristea eta suntsitzailea era berean.  Depresioa, garun gaixotasuna eta batez ere tinko eta gupidagabe pasatzen den bizitzari buruzko ikerketa sakona eta latza. Bere oinarriaren itxura sinplearen muinean, maila ezezagunetan harrapatzeko gai den giza disekzio distiratsu eta garratza ezkutatzen baitu. Aktore guztiak maila zoragarrian daude, baina nabarmentzekoak nola ez, Frances McDormand, Bill Murray eta Richard Jenkins erraldoiak.

Urteen poderioz ahanzturan erori den maisulana.

Non ikusi? HBO