[Gomendioa] 'Når støvet har lagt sig': atentatu baten erradiografia gordina

Atentatu horrek Kopenhage hiria astindu ondoren, zortzi pertsonen bizitzak gurutzatu egiten direla ohartuko gara pixkanaka, jatorri eta lanbide ezberdinetakoak. Eraso hori gertatu eta hamar egun lehenago kokatzen da tramaren erpin bat, baina baita gertatzen den unean eta noski, ondoren ere. Interesgarriena, guztia ikuspegi soziologiko baten betaurrekoetatik begiratzeko aukera eskaintzen digula da, jakin gabe elkarrekin konektatuta daudela -edota egongo direla- eta beren bizitzaren inflexio-puntu gorenean nola erreakzionatzen duten jakin gabe. 

Hain bete-betean sartzen gara pertsonaien errutina horretan, narrazioa hain da zehatza eta sendoa, une batzuetan ahaztu egiten zaigula pantailaren aurrean gaudela.

Oso ondo kontatutako eta harilkaturiko istorioen multzoa da. Batzuk besteak baino gustukoagoak izango dituzu, batzuk besteak baino interesgarriagoak irudituko zaizkizu, baina bata bestearekin uztartuz, errealismoa jariatzen duen kontakizun paregabea ikusteko aukera izango duzula ohartuko zara hasieratik. Guztia dago lotuta, denak du garrantzia, baita berez indarrik ez duten istorio txikiek ere.  Batuketa osoa eginaz, telesailaren bigarren zatiraino garamatzan gertakari-katea sortzen duten hari txikien bidez osatuak baitaude. Aktoreen lana oro har eta pertsonaien konposizioa bikain funtzionatzen du, bakoitzak bere gaitzak kontatzen dizkigulako, bere bizitza, zorigaiztoko momentu horretara iristeko duen modua. Atal bakoitzean ikusitako ezer ez dago hor betegarri bezala, eta denak du bere arrazoia hain bananduak diruditen bizitzak nahastean.

Pertsonaia sorta desberdin horiei esker, -Justizia ministroa, etxerik gabeko ama, jatetxeko jabea, zerbitzarietako bat eta bederatzi urteko alaba, iturgin bat, jatorri palestinarreko ile-apaintzaile bat, abeslari suediar bat eta mugikortasun arazo larriak dituen erretiratu bat dira- telesailak, milimetroraino aztertzen baitu daniar mikrokosmos hori.

Gainera, asko gustatu zait fikzioaren asmoa ez dela inongo momentua interesaren morboa atentatuan zentratzea. Guztiz kontrakoa. Helburua da zu eta ni izan gintezkeen pertsonaia horiei nola eragiten dien erakustea. Nola hobetu edo okertu gaitzakeen. Elkartu edo zatitu. Gaitzestea edo askatzea.

2020an ikusi dudan kontakizunik onenetarikoa iruditu zait. Benetakoa, gertukoa eta gordina, eta baita oso gizatiarra ere. Horrekin guztiarekin, telesail nordiko askok era paregabean egiten duten moduan, Danimarkako gizartearen erradiografia txiki bat ikusteko oso baliagarria iruditu zait. Ezinbestekoa.

Non ikusi? Filmin plataforman