Euskarazko ahozko jarduna ikertzeko zortzi egitasmo saritu ditu Euskaltzaindiak

Euskaltzaindiak, Mintzola proiektuaren bidez, euskaraz egiten den ahozko jardunari buruzko bi deialdi jarri zituen abian martxoan,  unibertsitateko edozein jakintza-alorretatik abiatuta, euskaraz egiten den ahozko jarduna ikergai gisa aukeratu izana saritzeko helburuz.  Deialdietako baten bidez gradu eta master amaierako zazpi lan saritzea zen asmoa, eta, bestean, hiru ikerketa-lan monografiko diruz laguntzea.

Hamabi eskaera aurkeztu dituzte eta epaimahaiak zortzi egitasmo hauek hautatu ditu: Beasaingo gazteen kafe-tertulia (Maddi Aiestaran); Adierazkortasuna lantzeko proposamen didaktikoa: imitazio-jolasak (Iñigo Otaegi); Hizkuntza nahasmenduaren aztarna bila euskaraz: kasu-marka eta aditz komunztadura (Ainhoa Leyaristi); Iruñerriko gazteen hizkera (Audrey Serrano); Ergatiboaren erabilera euskara-gaztelania kode-alternantzian: kasu azterketa (Endika Uriarte); Lexikoaren aldakortasuna Imozko hizkeran. Inkesta linguistikoak (Alazne Fernández de Muniain); Aldudeko ibarreko euskara (Oier Urreizti); eta Kode-alternantziaren erabilera eta jarrera euskaldunengan (Mikel Perez).

Gradu eta master amaierako lanak onduko dituen ikertzaile bakoitzak 1.500 euro jasoko ditu, eta irailaren 29ra arteko epea dute proiektuak garatzeko. Ikerketa-lan monografikoaren saridunak, berriz, 3.000 euroko laguntza jasoko du eta 2024ko otsailaren 29ra bitarteko tartea izango du lana egiteko.