Euskal Eskola Publiko Berriaren jaialdia prest da

Igande honetan —maiatzak 20— Euskal Eskola Publiko Berriaren 17. jaialdia egingo dute Iruñean. Nafarroaren konkistaren 500. urteurrenari loturik, 'Haziak hezten. 1512tik euskal curriculuma landuz' leloa izango du festak. Egitarau potoloa prestatu du Sortzen-Ikasbatuakek.

---

Azken aldian hezkuntzak jasan dituen murrizketak salatzeko eta heziketak duen garrantzia aldarrikatzeko, Euskal Herriak Hezkuntza Sistema propioa behar duela nabarmenduko Sortzen Ikasbatuazek igandean. Herrian parte hartzen duen eskola eta eskolan parte hartzen duen herria nahi du Euskal Eskola Publikoak, eta jai-giroan ospatuko dute aldarrikapen eguna.

Goizeko 10:30ean emango zaio hasiera jaialdiari Takonerako eszenatokian, ekitaldi xume baten bidez. Nafarroa Bizirik elkartea eta Fermin Valencia izango dira bertan. Eguerdi aldera bazkaltzeko zerbitzu azkarra eskainiko dute Boskezillo eremuan, eta gerturatzen den oroko jateko goxoak aurkituko ditu bertan.

Gainera, Iruñeako peñek ere ekarpen berezia egingo dute, bazkaria banatzen arituko direlako eta soberan geratzen den haragia Paris 365 jantoki sozialera bideratuko dutelako. Baina jasangarritasuna ez da elikagaiak ez botatzera mugatuko, aurten bi gune berezi izango baitira: olioa birziklatzekoa eta janari osasuntsuarena.

Internazionalismoak ere bere txokoa izango du, Palestinari buruzko Unitate Didaktikoa eta ipuina argitaratzeaz gain, Saharar herriarekin elkartasuna adieraziko baitu Berriozarko herriak; horretarako hemmarekin marrazkiak egin ahal izango dira.

Sortzen Ikasbatuaz osatzen duten kideek herritar orori zabaldu diete deialdia, eta beren ekarpena egiten duten taldeei, hala nola Bilgune Feministari eta Nafarroa Bizirik kolektiboari, eskerrik beroenak helarazi nahi izan dizkiete.