Etorkizuneko zinema zuzendariek Irunen erakutsiko dute euren lana

Etorkizuneko zinema zuzendariek Irunen erakutsiko dute euren lana https://www.gaztezulo.eus/albisteak/etorkizuneko-zinema-zuzendariek-irunen-erakutsiko-dute-euren-lana/@@download/image/201012218438RYS_4jpg.jpg
2012/12/13
berria
Hilaren 26tik 28ra izango dira XV. Irungo Zinema eta Bideo Gazte Lehiaketaren proiekzioak, eta 29an sariak banatuko dituzte. Bai sariak bai proiekzioak Amaia Antzokian izango dira, 19:00etan hasita.

238 film labur jaso ditu antolakuntzak; gehientsuenak Euskal Herriko zinemagileenak, baina Herrialde Katalanetako eta Espainiako, Argentinako, Txileko, Kanada eta AEBetako lanik ere jaso dute. Horietatik guztietatik 39 lan aukeratu ditu epaimahaiak, 35 urtetik beherako zinema zuzendariek eginak.

Igandetik aurrera Amaia Antzokira hurbiltzen denak aurpegi ezagunak ikusiko ditu pantailan; hala nola, Gorka Otxoa aktore donostiarra (Pagafantas) eta Ivana Baquero espainiarra (Luis Berdejok donostiarra zuzenduriko The New Daugther pelikulan aritu da, Kevin Costnerren ondoan). Otxoak El Rayo y la Sirena lanean hartu du parte -irudia lan horretakoa da- eta Baquero Ausencia laneko aktoreetako bat da.

Proiekzio gehienak hilaren 26tik 28ra bitartean izango badira ere, hilaren 23an, osteguna, Bidasoa Sailekoak pantailaratuko dituzte Amaia Antzokian bertan, 20:00etan.

1993an sortu zen ekimena Irunen, baina lehenengo urteetan ez zuen lehiaketa kutsurik; lanak pantailaratu zituzten lehiaketarik egin gabe. 1996an erabaki zuten lehiaketa bihurtzea; hortaz, aurten 15. urteurrena ospatuko dute.

Antolakuntzak nabarmendu du sail ofizialeko lau lanetik bat emakume batek egina dela; aurreko urtean baino emakume gehiago lehiatuko dira aurten.