Esther Garcia Urquijoren 'Margeriteren omenezko abestia' izeneko argi eta soinu-instalazioa paratu dute Iruñean

Esther Garcia Urquijo artistaren Margeriteren omenezko abestia argi eta soinu-instalazioa Marguerite Durasek Londongo National Theaterren enkarguz idatzi eta zuzendutako India Song izeneko antzezlan, liburu eta filmean oinarrituta dago. Egileak aitortu duenez,  "bere edertasunak eta sakontasunak" txunditu egin zuen. Hainbat gai jorratzen ditu Durasen lanak, hala nola depresioa, suizidioa, familiako egituretatik kanpoko maitasun librea, gas-argiari edo araua betetzen ez dutenei buruzko epaiketa soziala...

Duela 50 urte ikusi zuen pelikula Garciak eta akuarela sorta bat pintatu zuen. Instalazioak 72 akuarelen azetatoetan egindako kopien gainean erretroproiektatzen den argi-sistema bat du. Azetatoak banatuta eta biribilean jarrita daude aretoan, eta ispiluen bidez, argi hori proiektatu eta zabaldu dute. Aldi berean, antzezlaneko elkarrizketekin egindako soinu-muntaia bat entzuten da, artistak berak interpretatua.

Elementu horien guztien bidez, Garciak filma lehen aldiz ikustean esperimentatu zuen antzeko esperientzia sentsoriala sortu nahi du. Artistak desira eta plazera kontzeptuak lotzen dituen hariari heldu dio, eta hainbat gai lantzen ditu ikuspegi feministatik: boterea, sumisioa, erakarpen fisikoa, egungo sexu-harremanak, maitasun-ohiturak eta sexu-aniztasuna. 

Erakusketa Ziudadelako Labean ikus daiteke martxoaren 12ra arte. Asteartetik larunbatera, 11:30etik 13:30era eta 18:00etatik 20:30era bisita daiteke, eta igande eta jaiegunetan, berriz, 11:30etik 13:00etara.