Emakume musikarien omenezko kontzertua egingo du Bilboko Udal Musika Eskolak

Bilboko Udal Musika Eskolak emakumeek musikaren esparruan izan duten protagonismoa ikusarazi eta datozen belaunaldiei utzitako ondarea balioesteko kontzertua antolatu du. 

Emakume Musikagileak izenburupean, klasizismotik hasi eta gaur egunera arteko emakume musikarien lanak interpretatuko dituzte musika eskolako irakasle eta ikasleek: Maria Theresia von Paradis, Elisabetta De Gambarini, Louise Farrenc, Fanny Mendelssohn, Clara W. Schumann, Cécile Chaminade Mel. Bonis, Nadia Boulanger, Amy Beach, Florence Price, Helen Butterworth, Enya, Monica Aslund, Shania Twain eta Junkal Guerrero. 

Askotariko musika-instrumentuak entzuteko aukera izango da: txistua, akordeoia, pianoa, tronpa... Gainera, hari eta koral taldeek, pop-rock konboek eta piano klasikoak ere hartuko dute parte.

Kontzertua bihar izango da,hilak 10, 19:00etan, La Galerako Entzunaretoan. Sarrera doakoa izango da.