Ekoantsietatea, aldaketa klimatikoak osasun mentala kaltetzen duenean
2019/08/13
Ane Urrutikoetxea @aneurruti
Ingurumenarekiko kezkek antsietate psikologikoa eragin dezakete.
Kutsadura, beroa eta aldaketa klimatikoa protagonista dira egunero iristen zaizkigun albisteetan. Nahita ere, ekidin ezin den gai bihurtu da; politikariek eta enpresek neurri zehatzak hartzeko konpromiso falta dute, eta bitartean, gutako bakoitza ekintza txikiekin egoera aldatzen saiatzera kondenatuta dago.
Ingurugiroarekiko ardura horrek antsietatea eta nekea eragin zezake, eta tenperatura altuak zein plastikoz betetako ozeanoak gurean ere ikusten hasi garen honetan, geroz eta gehiago dira ekoantsietateak jota bizi direnak. Krisi klimatikoak ez du soilik gure planeta arriskuan jarri; gure osasuna ere kaltetzen ari da, bai fisikoa eta baita mentala ere.
Nature Climate Change aldizkariak argitaratu duenez, tenperaturaren igoerak eragiten du antsietate mailarik nabarmenena pertsonen osasun mentalean; hain zuzen, bero handiko hilabeteetan suizidio tasa igo egiten da eta depresio gehiago diagonstikatzen dira. Hain zuzen, beroak eragin zuzena du gure osasunean; loaren patroiak eraldatzen ditu atsedenaren kalitatea kaxkartuz, eta gure emozioak mailakatzen dituen serotonina maila aldatzen du ere.
Ikerketaren beste ondorioetako baten arabera, ezbehar naturalak jasan dituztenen osasun mentala nabarmen kaltetu izan da, Katrina urakaneko biktimak kasu. Halako gertaerak eragindako traumaz gain, aldaketa klimatikoaren eraginek nabarmen kaltetzen diete.
