Donostiako Giza Eskubideen 16. Zinemaldia: Programazio aurrerapena

Donostiako Giza Eskubideen 16. Zinemaldia: Programazio aurrerapena Petra Volpek zuzendutako 'Die göttliche Ordnung' film suitzarrak emango dio hasiera, datorren apirilaren 20an eta Victoria Eugenia Antzokian, Donostiako 16. Giza Eskubideen Zinemaldiari. Apirilaren 20tik 27ra bitarte ospatuko da. https://www.gaztezulo.eus/@@site-logo/logoa.png
2018/03/20
berria
Petra Volpek zuzendutako 'Die göttliche Ordnung' film suitzarrak emango dio hasiera, datorren apirilaren 20an eta Victoria Eugenia Antzokian, Donostiako 16. Giza Eskubideen Zinemaldiari. Apirilaren 20tik 27ra bitarte ospatuko da.
Donostiako Giza Eskubideen 16. Zinemaldia: Programazio aurrerapena

Filmean, Suitzako emakumeek botoa emateko eskubidearen alde egindako borroka kontatzen da. Urtero bezala, zinemaldiak askotariko gaiak landuko ditu, hala nola Justizia Leheneratzailea indarkeria matxistaren aurrean (A Better Man), frankismoaren biktimak eta justizia unibertsala, autokudeaketan eta lankidetzan oinarritutako supermerkatuak (Food Coop) eta beren lurrean gertatzen denaren kronikari bihurtutako siriar batzuen istorioa (City of Ghosts). Halaber, Elizaren barruko pederastia-kasu bati buruzko dokumental bat ikusi ahal izango da (Shootball).

  

Beste filmen aurrerapena 

 

 

GAIA: Sexu-indarkeria: biktima erruduntzat hartzea
BEAUTY AND THE DOGS / AALA KAF IFRIT (2017). Kaouther Ben Hania. Tunisia-Frantzia-Suedia-Norvegia-Libano-Qatar-Suitza

Ikasleen festa batean, gazte tunisiar batek, Mariamek, begiradak gurutzatu ditu Youssefenekin. Ordu batzuk geroago, kaleetatik noraezean dabil Mariam, hunkituta. Gau luze bat hasi berri da beretzat; bere eskubideak eta bere duintasuna errespetarazteko borrokan aritu behar izango duen gaua. Nola erdietsi justizia, ordea, borreroen alde dagoenean?

 

GAIA: Justizia Leheneratzailea indarkeria matxistaren aurrean
A BETTER MAN (2017). Attiya Khan, Lawrence Jackman. Kanada

Duela 22 urte, gau sargoritsu batean, 18 urteko gazte bat, Attiya Khan, korrika zebilen hiriko kaleetatik bere bizitza arriskuan zenean. Haren mutil-lagun Stevegandik ihesi zebilen, egunero abusatu baitzuen hark aspaldi batez. Urte batzuk geroago, Attiyak Steveri eskatu dio elkar ikusteko. Bien arteko harremana hark nola gogoratzen duen jakin nahi du neskak eta baita haren lehenaldiko ekintzen erantzukizuna bere egiteko prest ote dagoen ere. Emozionalki suntsigarria izango den elkarraldi hori Attiyak berak filmatua da Steveren baimenarekin, eta hortik abiatuta hasten da dokumentala. A Better Man filmak hasiera berri bat ere markatzen du Attiya bere onera etortzeko prozesuan, eta baita garrantzizko abiapuntua ere Steverentzat.


GAIA: Herritarren kazetaritza informazio-blokeoaren aurrean
CITY OF GHOSTS (2017). Matthew Heineman. AEB

Ahalmen handiko dokumental honek aktibista talde baten eguneroko bizitzari eta borrokari jarraitzen die. “Raqqa Is Being Slaughtered Silently” izenpean, 2014an elkartu ziren beren hiria ISISek konkistatu zuenean. Telefono mugikorren eta sare sozialen bitartez hurbiltzen da filma pertsona talde honen errealitatera, setiatutako leku horretan gertatzen ari dena mundu osoari ezagutzera eman nahian. Bizi duten errealitateari aurre egiten ari zaie –beti arriskuan eta mugimenduan den bizitza, klandestinitatea eta erbestea– eta guztia arriskatzen dute, gaur egungo munduan den gaitzaren inperio handienetako baten aurka borrokan jarduteko.


GAIA:  Frankismoaren biktimak eta justizia unibertsala
DESDE EL OTRO LADO DEL CHARCO (2017). Carlos Suárez, Isabel Suárez, Pablo Giménez. Espainia

Diktadura frankistaren biktimek zigorgabetasun historiko etengabea jasan izan dute eta jasaten dute oraindik ere, diktadura militarrean zehar egindako krimenak epaitzeari sistematikoki uko egin izan dion herrialde batean. Diktaduraren erantzuleen aurka Espainian prozesu judizial bati hasiera emateko saioa zapuztu izanak frankismoaren biktimentzat adierazi izan zuen kolpe latzaren ondoren, 2010ean leiho bat ireki zen ozeanoaren beste aldetik, Argentinako Errepublikatik zehazki. Argentinako auzitegietan frankismoaren krimenen aurka aurkeztutako kereilari hasiera emateak aukera historiko berri bat adierazten du Espainiako diktaduraren biktimentzat eta haien familientzat.


GAIA: Autokudeaketan eta lankidetzan oinarritutako supermerkatuak
FOOD COOP (2016). Tom Boothe. Frantzia

Krisialdi ekonomikoaren erdian erakunde bat sortu zen Brooklynen, Estatu Batuetan gutxi ezagutzen den tradizio bat adierazten duen instituzioa: The Park Slope Food Coop, elkarlaneko supermerkatu bat, non bertako 16.000 bazkideek, gizarteko sektore guztietakoek, hiru ordu hilabetean egiten baituten lan New Yorkeko janaririk onena erosteko eskubidea berenganatzeko, prezio izugarri merkeetan. Kooperatiba honen arrakasta berri txar bat da kapitalismoarentzat eta nekazaritzako elikagaien oraingo negozioarentzat, baina baita aukera paregabe bat ere janarien ekoizpen eta banaketa sistemak aldarazteko.


GAIA:  Gazako Zerrenda: bizitzeko egokia ez den lekua
MUHI – GENERALLY TEMPORARY (2017). Rina Castelnuovo-Hollander, Tamir Elterman. Israel-Alemania

Bere bizitzako zazpi urteetan, Muhi, Gazan jaiotako mutiko palestinar bat, Israelgo ospitale batean bizi da bere aitona lagun duela. Lau gorputz-adarrak ebaki behar izan zizkioten bizitza salbatzeko, eta harrezkero bertan bizi da, etengabeko zaintza espezializatua behar baitu, bere jaioterriko ospitale batean eman ezin diotena. Klinika da ezagutu duen bizileku bakarra; bertan ari da hazten eta bertan ari da ohitzen protesietara, aitona beti erne ondoan duela, herrialdetik egotzia izateko arriskuan. Bere familiak ezin du bisitatu berak nahi bezain sarri, nekez irten daitezkeelako Gazatik. Hazi ahala konplikatzen joango da bertan bere egoera.


GAIA:  Pederastia Elizan
SHOOTBALL (2017). Fèlix Colomer. Espainia

Shootballek Manuel Barberoren eta Joaquín Benítezen istorioa kontatzen digu; lehena abusu sexualak jasan dituen mutiko baten aita, eta bigarrena, aldiz, pederasta, Manuelen semeaz eta hogei mutiko gehiagoz abusatu zuena. Filmak Espainian izan den abusu sexualen trama handienaz hitz egiten digu, Kataluniako maristen eskola desberdinetako hainbat adingabeek jasandakoez. Aurkeztutako 42 salaketei esker argitara atera diren 13 pederastetatik, Joaquín Benítezen testigantza esklusiboan oinarritzen da: Maristen pederasta, 30 urtez 20tik gora adingabeez abusatu zuena. Aurreneko aldiz aitortzen ditu pederasta batek egin dituen eraso sexualak dokumental batean eta saiatzen da azaltzen eraso horien zergatia kontakizun psikologiko eta emozional baten bitartez. Benítezen istorioaren osagarri da Manuel Barberorena: adore handiko aita bat, “Maristen kasua” argitara ateratzea eta Benítez auzitara eramatea ahalbidetu duena.


GAIA:  Eskola jazarpena
EL SILENCIO ROTO (2017). Piluca Baquero. Espainia

Mariak sei urte ditu, eta ikastetxe berri batera heldu da. Ikaskideetako batzuek etorrera zapuztu nahi diote. Izengoiti bat jarri diote, eta ez dute bakean uzten. Victoriak hamalau urte ditu, eta urte gehiegi eman zituen ikastetxean irain mota oro pairatzen. Horren ondorioz, trauma osteko estresa jasan du hainbat urtetan. Mariok zortzi urte ditu. Eskolan potolo deitzen zioten, eta ikasgelako hiru mutilek egunero jotzen zuten. Autoestimua erabat galdu zuen, eta totelka hitz egiten hasi zen. Emmak hamar urte ditu. Eskola-jazarpenaren protokoloak eskolako neska seinalatu bihurtu zuen, eta lagunik gabe geratu zen.