Bilbaopoesia literatur jaialdia, urriaren 15etik 23ra

'Poesia eta zinea' lelotzat harturik, aurtengo Bilbaopoesia literatur jaialdiak formatua aldatuko du; poesia eta zinearen arteko erlazioa gauzatzeko, Pasolini, Cocteau eta Aitzol Aramaio bezalako zinegileen lanak proiektatuko dituzte, guztiek landu baitzuten poesia beren filmetan, eta Unai Elorriagak eta Kirmen Uribek, besteak beste, hartuko dute parte gonbidatu moduan. 

---

Urriaren 15etik 23ra bitarte egingo dute aurten Bilbaopoesia literatur jaialdia. Poesia idatzi zuten zinegileak, eta poesiak biltzen dituzten edo hizkuntza poetikoa erabiltzen duten filmak izango dira edizio honetako ardatz, eta horretarako hainbat film proiektatuko dituzte Bidebarrietako Liburutegiko ekitaldi aretoan.

Gonbidatu nagusiak, esan bezala, Antonio Gamoneda 2006ko Cervantes Saria, Juan Barja Madrilgo Circulo de Bellas Arteseko zuzendaria, eta Kirmen Uribe, Jose Fernandez de la Sota eta Unai Elorriaga euskal idazleak izango dira.

Baita musika ere
Poesia, filmak, eta nola ez, musika ere izango da Bilbaopoesia jaialdiko protagonista. Galatea taldeak, esaterako, musika ikuskizuna eskainiko du urriaren 21ean, igandea, 19:30etan, eta Iñaki Salvador piano joleak eta Ainara Ortega abeslariak ere Zineko ahotsak emanaldia eskainiko dute urriaren 23an, jaialdiari amaiera emateko.

Emanaldi guztietarako sarrera doakoa eta librea da, leku guztiak bete arte.