Arabako Antzinako Musikaren Astean hamalau kontzertu izango dira

Arabako Antzinako Musika Astearen 40. edizioa gaur abiatuko da eta hamalau kontzertu egingo dituzte hilaren 10era bitarte, lurraldeko hainbat lekutan, kokapen naturaletan horietako batzuk. 

Europako musikariak ere bertaratuko dira, tartean Jean Rondeau klabezinista, Lea Desandre mezzosopranoa, Thomas Dunford laudista, Les Musiciens de Saint Julien taldea. 

Mendi ibilaldi musikalak ere eskainiko dira aurten, Erdi Aroko erromesaldien harira. Esate baterako, Egeria izeneko taldearekin Pinedoko kobazuloetatik Tobillasko eliza erromanikora joango dira. 

Ardoaren harira, urrezko mendeko musika eta testuak lotzen dituen ikuskizuna estreinatuko da, Sara Agueda harpalariarekin eta Miguel Cubero aktorearekin. 

Gaur izango da lehen emanaldia Lea Desandre mezzosoprano frantziar-italiarrarekin eta Thomas Dunfordekin, Gebaratarren dorretxean, Barrundian, 19:00etatik aurrera.

Kontzertuetatik hamaika doakoak izango dira, baina gonbidapena beharko da. Sarrerak eta gonbidapenak web-orrian eskura daitezke.