APIRILA UDABERRIA LAGUN BILA
Eguneroko inertzia, orduen pazientzia eta motibazioaren ausentzia. Denak irabiagailuan txikitu eta ondu udaberriko jantzia, galtza motzetan arima eta martxan gure izatearen espazio-ontzia. Balkoietan gosaria, azala xigortzen hasi naiz ia, negua babesean pasa ostean, kalean aurkitu baitut argia, inguru goxo eta bero bat... eta entzuten, ikusten, ezagutzen jarraitzeko gogo bizia.
SOKAN DANTZAN
Euskal Kultur Erakundeak (EKE) doako SOKA, euskal dantzari begiradak erakusketa antolatu du, apirilaren 3an hasi eta maiatzak 15 bitartean, Mauleko Ondarearen Etxean. Maulera hurbiltzeko asmoa duenak, hilaren 7a du data aproposena, Kalebegiak filma ikusgai izango baita Maule Baitha Gelan.
Hilabetea agortu baino lehen, hurbildu Eibar aldera, bertan, Euskal Mitologia: kultura ondarea ikastaroari ekingo baitiote hilaren 25ean.
Eta Maskarada zaleok, adi! Zita ugari! Barkoxeko plazan hilaren 16an; Gamere-Zihigan 23an eta Ürrüstoi-Larrabilen hilaren 30ean.
ALFERRIK MUSIKA BARIK
Kontzertu asko baina erabaki egin behar, nik afrobeat-a, cumbia kolonbiarra eta soinu espazialak nahasten dituen The Mauskovic Dance Band taldea aukeran, Donostiako Dabadaba aretoan izango dira hilaren 5ean. Doinu gogorragoak Bellako, Meltdown eta Hilotz taldeen eskutik, hilaren 8an Donostiako Dokan.
Basque Fest Rock City 2017 izenburupean Leun talde bizkaitarrak eta Grande Days donostiarrek euren disko berriak aurkeztuko dituzte apirilaren 12an Bilboko Kafe Antzokian. Mahai gainean, beraz, nahi bezainbeste aukera, mikro-zorionaren mila adiera, norberaren gustuen arabera. Ospa dezagun neguaren amaiera, eguzkiari begira, pentsatu mundua ez, baina gure barne unibertsoa aldatzerik badela, bizitzari argiz eta ilusioz begiratzen dionak bueltan beste hainbeste jasoko duela.