Ane Gabarain Emmy sarietan izendatua

Ane Gabarain donostiarrak aktore onenaren saria lor dezake azaroaren 22an banatuko diren nazioarteko Emmy sarietan. HBOk eta Alea Mediak ekoitzitako Patria telesailean egindako lanagatik izendatu dute Gabarain. Gabarainez gain, Valeria Betucelli aktore argentinarra (El cuaderno de Tomy), Menna Shalaby egiptoarra (Every Week Has a Friday) eta Haley Squires britainiarra (Adult Material) aukeratu dituzte aktore-lan onenaren sariaren lehiarako. 

International Emmy Awards nazioarteko sariek Estatu Batuetatik kanpo emandako eta ekoitzitako telebista saioak saritzen dituzte. Aurten hogeita lau herrialdetako lanak izendatu dituzte, tartean Argentina, Txile, Kolonbia, Mexiko, Brasil eta Espainiako telesailak.

Ane Gabarain ibilbide luzeko euskal aktorea da. Komediarekin oso lotua izan da bere ibilbidea baina drama ere landu izan du. Telebistan, zinean zein antzerkian aritua da, gainera. Telebistan Bi eta bat, Jaun eta Jabe, Goenkale eta Alli Abajo telesailetan aritu izan da lanean eta egun Amar es para siempre telesailean dihardu. Zinean honako pelikuletan parte hartu izan du, besteak beste: Sukalde kontuak, 80 egunean, Pecata minuta, Loreak eta Agur Etxebeste!. Oholtza gainean ere sarri ikusi izan dugu aktore donostiarra eta azkenaldian Zoaz bake santuan!, Kottauak!  eta Izena antzezlanetan dabil.