Aldaketa klimatikoa derrigorrezko ikasgaia izango da Italiako eskoletan

Aldaketa klimatikoa derrigorrezko ikasgaia izango da Italiako eskoletan Ikasgaia derrigorrezko hezkuntzako etapa guztietan egongo da. https://www.gaztezulo.eus/albisteak/aldaketa-klimatikoa-derrigorrezko-ikasgaia-izango-da-italiako-eskoletan/@@download/image/191106094807-01-italy-climate-protest-file-full-169.jpg
2019/11/12

Testua: Jaione Dagdrømmer @hellehellei

Ikasgaia derrigorrezko hezkuntzako etapa guztietan egongo da.
Aldaketa klimatikoa derrigorrezko ikasgaia izango da Italiako eskoletan

Aldaketa klimatikoa eskola italiarretako irakasgaia izango da datorren ikasturtean. Lorenzo Fioramonti hezkuntza ministroak iragarri duenez krisi klimatikoaren gaia hezkuntzan txertatuko duen lehen herrialdea izango da. 2020ko irailetik aurrera Italiako eskola guztiek urtean 33 ordu eskainiko dizkiote (ordubete astean) aldaketa klimatikoaren gaia jorratzeari.

Horretaz gain, ministroak adierazi du irakasleek ingurugiroari buruzko klaseak emango dituztela derrigorrezko hezkuntzako etapa guztietan jasangarritasuna bultzatuz. Fioramontiren helburua jasangarritasuna eta klima hezkuntza modeloaren zentro bilakatzea da, arlo ezberdinetan (geografia, matematika edo fisika bezalakoak) landuz gaia ikuspegi ezberdinetatik, gizakiaren eragina erakutsiz ikasleei.

Ingurugiroaren aldeko ekintzaileek baikortasunez jaso dute berria, baina ohartarazi dute planetaren zaintzaren ardura guztia ez lukeela gazteen bizkarrean egon behar. Umeak heztea jasangarritasunaren inguruan oso garrantzitsua dela argitu dute, baina zientziak datozen hamar urteak hil ala bizikoak izango direla dio, eta horregatik ezin zaiela datozen belaunaldiei itxoin adierazi dute. Halere, neurri ederra da gazte gaztetatik planeta zaintzearen garrantziaz kontzientziatzeko.