Aitor Etxebarriak Gernikako bondarketa gogoratzeko obra sinfonikoa egin du

Aitor Etxebarria gernikar konpositoreak Gernika 85. obra sinfonikoa sortu du, "orain arteko proiekturik pertsonalena, ausartena eta handiena".  Bonbardaketa abiapuntu hartuta, ia ordu beteko obra sinfoniko eta korala sortu du konpositoreak. Ekainaren 30ean aurkeztuko du Bilboko Euskalduna Jauregian, Bilboko Orkestra Sinfonikoa, Gaudeamus abesbatza eta Evelyn Glennie perkusio-jotzailearekin elkarlanean. 

Obra sinfonikoa lau mugimenduz osatua izango da. Lanak isiltasunak protagonismoa hartzen duen pasarteak ditu, eta estetika eszentrikoen eta paisaia minimalisten bidez soinu-ibilaldi batean dinamika gailena duten beste batzuk konbinatzen ditu. Musikaz gain, bonbardaketatik bizirik atera zirenen lekukotasunak proiektatuko dira kontzertuan zehar, Gogora institutuak grabatutako bideoetan. Testigantza horiek 2018an zehar grabatu ziren eta, 2019az geroztik, Gernikako Bakearen Museoan daude ikusgai. 

Etxebarriak azaldu duenez, proiektuaren hazia bonbardaketaren 80.urteurrenerako egindako Markak dokumentala izan zen. Hannot Mintegia zinemagileak zuzendu zuen lana, eta Etxebarriak dokumentalerako musika sortu zuen. Etxebarriaren hitzetan, "soinu banda hartan agertu ziren obra honen lehen ernamuinak".

Gernika 85. Evelyn Glennie eta Aitor Etxebarriaren arteko bigarren lankidetza da, duela urte batzuk film baten soinu-banda egin ondoren. Mundu osoan ezaguna den perkusio jotzaile honek, Björk edo Mark Knopfler artistekin diskoak grabatu dituenak, konpositorearekin batera sortu ditu ekainaren 30ean berak zuzenean joko dituen bakarlanaren zatiak.

Kontzertu honetarako sarrerak salgai daude Euskalduna Jauregiaren webgunean.