‘Hamaika-klik’: Hamaika Telebista-ren ikus-entzunezkoen lehiaketa
Testua: Gaizka Izagirre @Gaizka_Izagirre
Gazteak ikus-entzunezkoen kontsumo eta ohitura berrietara hurbiltzeko helburua du Hamaika Telebistak atondu duen Hamaika-klik lehiaketak. Lehiaketaren gaia librea da, eta lau atal ditu: bideo laburrak —lau minututik hamabost minutura bitartekoak—, mikrobideoak —minutu batetik lau minutura bitartekoak—, Instagram, Tik-Tok eta halakoetako istorioak —gehienez, 15 segundokoak—, eta Whatsapp, Telegram eta sare sozialetarako memeak. Lanak euskara hutsean aurkeztu beharko dira, bai ahotsa, musika, idatziak eta grafismoa. Irailaren 25era arte bidal daitezke ikus-entzunezkoak urteurrena@hamaika.eus helbidera —informazio gehiago nahi izanez gero, helbide berera idatzi—.
Atal bakoitzeko irabazle bat izendatuko du Hamaika taldeko eta ikus-entzunezko arloko adituek osatutako epaimahaiak, eta ordainsaria jasoko dute: mila euro, 750 euro, 300na euro, hurrenez hurren.
Urriaren 23an ezagutaraziko dituzte saridunak, eta Hamaika Telebistak gune berezi bat jarriko du herritarrek lehiaketan aurkeztutako bideo guztiak ikusteko.
