‘20.000 especies de abejas’: Hunkigarria eta eredugarria
Testua: Gaizka Izagirre @Gaizka_Izagirre
Zuzendaria: Esti Urresola
Urtea: 2023
Herrialdea: Euskal Herria
Generoa: Drama
Iraupena: 129 minutu
Non ikusi? Zinemetan / Filmin
Zeri buruzkoa da?
Zortzi urteko Aitor/Coco/Lucia da filmeko protagonista. Inguruko guztiek Aitor esaten diote, baina berak ez du izen hori maite, ezta Coco deitzea ere, Lucia baizik. Krisi profesional eta sentimental batean murgilduta dagoen amak (Ane/ Patricia Lopez Arnaiz), hiru seme-alabekin batera, Ipar Euskal Herrian dagoen amonaren etxera (Itziar Lazkano) egun batzuk pasatzera joatea erabaki du. Izeba Lourdes (Ane Gabarain) ere bertan dago, erlezaina da, eta mendian duen baserri txiki batean bizi da.
Zergatik Ikusi?
Jorratzen duen gaia eta erakusten duen errealitatea mundu guztiak ezagutu beharko lukeelako. Emakumeei buruzko istorioa den arren, eta hauek duten rolei buruzkoa, ama eta alabak osatzen dute filmaren bizkarrezurra. Sofia Oterok (alaba) eta Patricia Lopez Arnaizek (ama) aho zabalik uzteko moduko antzezpen lana egin dute eta pertsonaiak behar dituzten ñabarduraz hornitu dituzte. Krisi sentimental eta profesionalean murgildutako ama alde batean, eta bere identitatearen bila dabilen alaba bestean. Ispilu joko polita osatu du Urresolak bi pertsonaia hauekin; Luciak zenbat eta askatasun handiagoa lortu, eta sentimenduak adierazteko erraztasun handiagoa izan, alderantzizko prozesua ematen da Aneren pertsonaian. Formalki ere nabari da intentzio hori; Luciari kamerarekin egiten zaion jarraipena, adibidez, pertsonaiarengandik oso hurbil dago beti, eta helduen mundua nahiko at geratzen da; amarekin, berriz, alderantziz gertatzen da. Filmean agertzen diren gizonezko pertsonaiak ere, Gorka senarraren pertsonaia salbu, planotik eta fokutik kanpo geratzen dira gehienetan.
Ezinbestekoak
- Transhood (Sharon Liese, 2020).
- Mikele (Ekhiñe Etxeberria, 2017).
- Petite fille (Sébastien Lifshitz, 2020).
