Uxue Alberdi eta Idoia Santamaria, Euskadi Sariak
"Emakume bertsolarien bizipenak eta teoria feminista gurutzatzeko moduagatik" sarituko dute Uxue Alberdiren Kontrako eztarritik saiakera; itzulpengintzako Euskadi saria aldiz Idoia Santamariari emango diote, Ingeborg Bachmann austriarraren Aldibereko ipuin bilduma euskaraz jartzeagatik. Gaztelaniazko literaturako eta saiakerako Euskadi sariak ere jakinarazi dituzte: Aixa de la Cruzek eta Borja Barraguek jasoko dituzte, Cambiar de idea eta Larga vida a la socialdemocracia lanengatik.
Hala, argiturik gelditu dira aurtengo Euskadi Sariak, izan ere, aurreko astean beste hiru sariak jakinarazi zituzten: Karmele Jaio, Aitaren etxea-gatik (Euskarazko literaturako saria); Iñigo Astiz, Joemak eta Polasak liburuagatik (Euskarazko Haur eta Gazte literaturako saria); eta Miren Asiain Un millín de ostras en lo alto de la montaña lanagatik (Ilustrazioko saria). Horiek eta atzo jakinarazitako egileek azaroaren 19an jasoko dituzte sariak, Bilboko Azkuna zentroan.