SEXUMATOIA: XABIN FERNANDEZ
“Gurasoek 'Stop' seinalea oparitu zidaten bisita zegoenean atean zintzilikatzeko”
TELEBISTAN ERREPORTARI ZEIN GAZTEAN ESATARI LANETAN EZAGUTUKO ZENUTEN XABIN FERNANDEZ ZUBELDIA (LEGORRETA, 1985). GIB-A DIAGNOSTIKATU ZIOTENETIK BIZITAKOAK PLAZARATZEN ARI DA ‘KANPORA SARTZEN’ ANTZEZLANEAN.
- Zein da zure film erromantiko gogokoena?
Shrek (Andrew Adamson, Vicky Jenson, 2001). - Eta noizbait bero-bero jarri zaituen telesaila?
Game of Thrones-eko (David Benioff, D.B. Weiss, 2011) printzeren bat agertzean, urduri jartzen nintzen. Oberyn Martell zen nire gogokoena. - Noiz eman zenuen zure lehen musua?
13 urterekin. Gerora, beste lehen musu bat eman nuen. Hura hobea izan zen. - Joango al zinateke zita batera itsu-itsuan?
Aurretik berarekin hitz egiteko aukera izan badut, bai. Txat bidez bada ere. Mezua idazteko moduak asko balio du. - Zer da zita batean inoiz esan behar ez dena?
“Desodorantea inposatu diguten zerbait da”. - Lehen begiratuan segituan erakartzen zaituena?
Begiradan uste baino gehiago ezagutzen da pertsona. Eta ipurdi on batean ere bai.
- Inoiz eman al dizute kalabazarik?
Asko jasotakoa naiz. Mutilekin ligatzen hasi nintzenean, ez zegoen Grindr eta berezko radarra behar zen. Ez zuen beti funtzionatzen. - Zein da ligatzeko erabili duzun trikimailurik onena?
Norbait begira ari bazaizu, heldu begiradari. Despistatzen denean, mugitu lekuz. Berriz begiratzen badu eta zure bila hasten bada, lan erdia egin duzu. - App-ak edota sare sozialak ligatzeko erabili al dituzu?
Interneta etxera heldu zenean probatu nituen lehen txatak: Kaixo.com, Terra… pleistozeno garaikoak. Besteak berandu iritsi zaizkit. - Zer menu prestatuko zenuke zita baterako?
Pizza on bat nahikoa da. Lehen zitetan janaria da gutxienekoa. Hori gero dator. - Inoiz eman dizuten gomendiorik onena ligatzeko?
“Berriz? Ez!”. - Eta txarrena?
“Ez egin kasurik. Bera etorriko da”. - Zein da zurekin oheratzeko hobekien funtzionatu duen esaldia?
“Ez naiz inoiz Legorretan izan”. - Maniarik ba al duzu oheratzerakoan?
Berotu eta luzaketarik egin gabe ezin da kirolik egin. - Inoiz harrapatu al zaituzte jo eta su?
Ezezagunen batek agian aurkitu du sorpresatxoren bat. Gurasoek ‘stop’ seinalea oparitu zidaten bisita zegoenean atean zintzilikatzeko. - Inoiz egin al duzu txortan leku publiko batean?
Bai, leku publikoan egiteak bestelako biharamuna uzten du. Gehienetan, merezi du ajeak. - Larrutan egin duzun lekurik gogokoena?
Ohe luze eta zabala. Ez naiz edozein lekutan kabitzen.