SEXUMATOIA: ANA GALARRAGA

SEXUMATOIA: ANA GALARRAGA “Ikerketek frogatu dute beroketak ezinbestekoak direla emaitza ona lortzeko...” https://www.gaztezulo.eus/albisteak/sexumatoia-ana-galarraga/@@download/image/SEXUMATON_ANA GALARRAGA_3.jpg
2020/08/04
“Ikerketek frogatu dute beroketak ezinbestekoak direla emaitza ona lortzeko...”
SEXUMATOIA: ANA GALARRAGA

Zeinek dio zientzia ez dela dibertigarria? Eta kitzikagarria? Ana Galarragak (Zarautz, 1970) urtetan gerturatu dizkigu zientziaren sekretuak Elhuyarren eta beste hainbat komunikabideetan; baina sekretupeko ze beste esperimentu ekarri ote dizkigu?

 

  • Zein da zure film erromantiko gogokoena?
    Frankenstein (1931, James Whale)
  • Zer da zita batean inoiz esan behar ez dena?
    “Zer ordu da?”
  • Noiz eman zenuen zure lehen muxua?
    Kuantikaren arabera espazioa eta denbora erlatiboak direnez, ezin ziur jakin…
  • Lehen begiratuan segituan erakartzen zaituena?
    Ikusten ez denak: ahotsak, usainak, feromonak, elektromagnetismoak… Izan ere, miopea naiz!
  • Inoiz eman al dizute kalabazarik?
    Bai, eta ez dago gaizki ere: kaloria gutxi ditu, eta bitamina eta mineral ugari. Baina, aukeran, nahiago zigala batzuk, adibidez.
  • Ligatzeko erabili duzun trikimailurik onena?
    Denak erabiltzen saiatzen naiz: kimikoak, fisikoak, biologikoak, neurologikoak, fisiologikoak, hormonalak, elektrikoak, genetikoak... Baina oraindik ez dut formula matematikoa aurkitu.
  • Zientziak argitu ote ditzake ligatzeko sekretuak?
    Edozein gaitan, zientziak zenbat eta alderdi gehiago argitu, orduan eta galdera gehiago sortzen dira. Ligatzeko sekretuekin ere gauza bera gertatuko litzatekeelakoan nago.
  • Inoiz egin al duzu “esperimenturik” ohean?
    Bai, noski! Zorrotz, gainera; esperimentuen etapa guzti-guztiak betetzen ditut: behaketa, hipotesia, ikerketa, emaitzak eta ondorioak.
  • Zita batean, zuk ematen al duzu lehen pausoa, ala nahiago besteak aurrea hartzea?
    Eboluzioaren teoriak dioenez, ingurunera egokitzea da bizirauteko gakoa; hortaz, ingurunea zein den, era batera edo bestera jokatzen dut.
  • Ze menu prestatuko zenuke lehen zita batean?
    Dietetika eta nutrizioaren aholkuak jarraituz, zerbait arina eta energetikoa, aldi berean, betekadarik izan gabe indartsu egoteko.
  • Erabili al duzu inoiz zientziarekin lotutako datu interesgarririk norbait liluratzeko?
    “Bazenekien klitoriaren %90 ezkutuan dagoela?”
  • Ligatzeko playlist bat daukazu?
    Bai, algoritmo oso sofistikatu baten bidez osatua.
  • Argia piztuta ala itzalita?
    Schrödingerren katua bezala: piztuta eta itzalita, aldi berean.
  • Etxeko zein txoko da zuretzat onena sexurako?
    Etxean izan behar al du? Laborategikoa zein landa-lana, biak dira osagarriak eta gustagarriak.
  • Aurreko beroketak bai ala zuzenean ekintzetara joatea nahiago?
    Ikerketek frogatu dute beroketak ezinbestekoak direla emaitza ona lortzeko. Hori bai, ez dute esaten zenbat denbora iraun behar duten.
  • Zein da zure fantasiarik zoroena?
    Bizidun estralurtarrekin topo egitea. Dena legoke deskubritzeko!