Rap kantarien arteko txapelketa egingo dute igandean Gasteizen

Mendizorrotzako pabilioian egingo dute igandean, uztailaren 3an, Unity Stars Nation World Summer Cup txapelketarako sailkapen-jardunaldietako bat. Bertan, mundu osoko freestyler onenak lehiatuko dira. Txapelketaren bigarren edizioa izango da aurtengoa.

Unity Stars Nation World Summer Cup txapelketan nazioarteko panorama hispanoko MC top-enetako batzuk eta La Cancha underground lehiaketatik iritsitako Espainiako Estatuko plazetako lau promesa izango dira buruz buru. Latinoamerikan eta Espainian “oilarren borroka” horietan ohikoak diren rap-kantariak bilduko dira.

Honako hauek izango dira Mendizorrotzan: Chuty (Espainiako Estatua), Lobo Estepario (Mexiko), Hander (Espainiako Estatua), Ethico (Espainiako Estatua), Jesús LC (Espainiako Estatua), Éxodo Lirical ( Dominikar Errepublika), Mecha (Argentina) eta Skone (Espainiako Estatua).

Txapelketa gaur hasiko da Bartzelonan eta, Gasteizen egon ondoren, beste hiriburu batzuetara iritsiko da: Gijonera,uztailaren 8an, eta Coruñara, uztailaren 9an. Finala, aldiz, Madrilen egingo dute uztailaren 10ean.

Igandeko hitzordurako sarrerak ekitaldiaren webgunean eskura daitezke. Txapelketako saio guztiak zuzen-zuzenean eskaintzen dituzte Mediaproren UBEAT plataformaren bidez.