Leire Martinez eta Jon Plazaola protagonista dituen 'Itsatsita Berriz' fikzio musikala Instagramen
Miren Arrieta eta Gari Uriarte izan ziren Itsatsita Instagrameko serie musikalaren aktore nagusiak eta orain bueltan dator jarraipena, beste protagonista batzuekin. Jon Plazaola aktorea eta La Oreja de Van Gogh taldeko Leire Martinez dira Itsatsita Berriz fikzio musikaleko pertsonaia nagusiak gorpuztu dituztenak. Plazaolaren lehen musikala da eta Martinezen lehen aktore lana.
Oraingoan, 40 urte inguruko bikote bat lotuta geratuko da auto batean txortan ari direnean. Larrialdi-zerbitzuko osasun-profesionalek ezin dute sinetsi: Penis captivus kasu bat, berriz ere! Bikotea itsatsita dagoen bitartean, zalantza existentzialak kontatzen dizkiete elkarri, baita haien beldurrak eta ametsak ere. Protagonistek, ordea, banandutako bikotekideekin izandako alabak dituzte. Nola erreakzionatuko dute?
Plazaola eta Martinezez gain, beste batzuk ere aritu dira aktore lanetan. Iker Huitzi Demodé Quartet taldeko kideak erizainaren papera jokatu du berriz ere. Itsatsitaren lehen edizioan protagonista izandako Gari Uriarte, Anne Lukin abeslaria eta Goazen telesailean ezagututako Aitziber Errazkin ere agertuko dira.
Instagramen ikus daiteke, @itsatsita_eitb kontuan, eta egunero atal bat kaleratzen dute. Zortzi atal labur igo dituzte orain arte. Aurrerago, urriaren 25ean, Primeran plataformara iritsiko da.
