Larunbatean, Jokoz Kanpo eguna egingo dute Ezpeletan

Larunbatean, Jokoz Kanpo eguna egingo dute Ezpeletan https://www.gaztezulo.eus/albisteak/larunbatean-jokoz-kanpo-eguna-egingo-dute-ezpeletan/@@download/image/20125283415jokoz_kanpo_kartela.jpg
2012/12/13
berria
Hirugarren urtez, ekainaren 2an —larunbata— egingo dute Jokoz Kanpo eguna Ezpeletan. Kaleko ikuskizunez beteriko festa da, eta horietako gehienak doan ikus daitezke. Gai giroa arratsaldeko 15:30ean hasiko da taberna ibiltariarekin batera, eta gauera bitarte dantzaz, musikaz, magiaz, barrez eta akrobaziak beteko dira Lapurdiko herriko kaleak.

Pinpulka elkarteak antolaturik, adin guztientzako ikuskizunak eskainiko dituzte egun osoan zehar. Egitarau potoloa prestatu dute, hain zuzen, kaleko arte diziplina anitzak elkarrekin uztartu eta jaialdi alai eta koloretsua izan dadin. Horretarako, txaranga, zirkoa, pailazoak, magia, musika eta kabareta ez dira faltako arratsalde osoan zehar.

Bazkal ostean hasiko da jaia, Corbibar taberna ibiltariak ateak zabaltzearekin batera. Batetik bestera ibiliko dira, txarangaz lagundurik. Segidan, eta bata bestearen ostean, ikusgai izango dira ikuskizunak. Amaitzeko, La Famille Goldini kabaret zirkoak ikuskizuna eskainiko du, eta berau izango da ordaindu beharreko ikuskizun bakarra. Arratsalde osoan zehar, ordea, doan ikusi ahal izango dira beste guztiak.

Egitaraua


15:30 Corbibar taberna ibiltaria zabalduko dute, eta hortik aurrera, gainerakoak:

Funky Style Brass txaranga eroa abiatuko da kaleetan zehar

Ronan Tablantec zirko ziniko eta itsastiarra

Banjo Barjo musikari bitxia, bere bano eta bizikleta ibiltariarekin

Dr. Troll magoaren ikuskizuna

Bapatean ZirkoakTaberna ikuskizuna eskainiko du, Euskal Kultur Erakundearen partaidetzarekin

La Conserveirie pailazo taldearen La tête en confiote ikuskizuna, Harri Xuri partaidetzarekin

Alboka Tropik taldearen kontzertua: trikitixa, alboka, panderoa eta tronpeta

La Famille Goldini kabaret zirkoaren Travelling Palace ikuskizuna, sarreraz ordaindu beharrekoa