Janari bilketa antolatu du Zaporeak taldeak Euskal Herrian
Ane Urrutikoetxea @aneurruti
Arroz luzea, makarroiak, lekariak (dilistak, txitxirioak, babarrunak), atuna eta sardinak latan, oliba olioa, espeziak (piperbeltza, piperbeltz zuria, kuminoa, curry-a), esne hautsa eta barra energetikoak. Horiek dira Lesboseko larrialdi egoerari berehalako erantzuna emateko behar dituzten elikagaiak. Zaporeak proiektuak Euskal Herri osoan egingo du bilketa ostiral eta larunbatean, hilaren 25 eta 26ean.
Janaria biltzeko hainbat puntu jarri dituzte hiri eta herrietan; guztietan, goizetik arratsaldera bitarte izango dira ahal beste elikagai eskuratzeko. JARRAIAN TOPATUKO DUZUE ZUEN BIZILEKUKO JASOTZE PUNTUA.
MORIAKO ERREFUXIATUAK, EGOERA LARRIAN
Aurreko astean lehen koronabirus kasua detektatu zuten Lesboseko errefuxiatuen kanpalekuan eta ordutik, ezbeharrak bata bestearen atzetik etorri dira. Ondoren, sute batek 12.000 lagun bota zituen bere etxoletatik, eta noraezean utzi zituen. Greziak indarrez erantzun zuen, eta tiro eremu batean kanpaleku inprobisatu batzuk egin zituen, 3.000 lagunentzako (nahiz eta kalean gelditutakoak 12.000 izan). Gainera, ez diete bertatik ateratzen uzten.
Zaporeakeko boluntarioek bestalde, itxialdia egin behar izan dute hainbat egunez, koronabirus kasu batengatik; dena den, azkar antolatu dira egunero banatzen dituzten 1.200 janari anoak kozinatzen jarraitzeko.
