Himalaya ezezaguna hizpide

Himalaya ezezaguna hizpide https://www.gaztezulo.eus/albisteak/himalaya-ezezaguna-hizpide/@@download/image/20109216224imalaya_asier_aranzabal_3.jpg
2012/12/13
berria
Kaxmir eta Ladakh, Himalayako zonalde ezezagunenari buruzko ikus-entzunezko emanaldiak eskaintzen ari dira Mila Gallastegi eta Asier Aranzabal argazkilariak. Hurrengoa Gasteizko Luis Ajuria aretoan egingo dute; urriaren 19an, asteartea, arratsaldeko 20:00etan.

"Karakorun eta Himalaya mendilerroen artean, Erdialdeko Asiaren atarian, Kaxmir eta Ladakh-ek osatzen duten eskualdea gerra-liskarren sinonimo da gaur egun Indiak, Txinak eta Pakistanek beren mugak zabaltzeko duten handinahia dela eta. Inguru misteriotsu honek, baina, kontraste eta ezusteko polit asko gordetzen ditu bidaiariarentzat: zelaiak, lore-baratzeak, mendi elurtu ikusgarriak, basamortuak, errekak, laku urdin gardenak…" . Horixe Mila Gallastegi eta Asier Aranzabalen hitzak. Horixe gonbitea.

Eibarren jaio eta hazi arren, bikotea Amorebieta-Etxanon bizi da egun. Gaztetatik Euskal Herriko eta Piriniotako mendietan ibiltzeko eta argazkiak egiteko zaletasuna izan dute, eta orain urte batzuk mundu zabalera egin dute salto. Oinez edo tokian tokiko garraiobideak erabilita, Nepalen, Perun, Morkon, Etiopian, Mongolian, Indonesian, Saharan, Iranen, Malin, Groenlandian eta, azkenekoz, Kaxmir eta Ladakhen izan dira. Bidaiatzeko filosofia berezi honek natura eta kultura uztartzea ahalbidetzen die, paisaia ikusgarriekin gozatuz eta bertakoak hurbiletik ezagutuz.

Jasotako irudi eta esperientziak bilduta, ikus-entzunezko dokumentu landuak prestatzen dituzte, emanaldietan lurralde urrunak guganaino helarazteko asmoz. Bidaia abenturekin, paisaien edertasunarekin eta gurearekin apenas antzik duten bizimoldeekin gozatzeko aukera polita da. Hurrengo emanaldia –Kaxmir eta Ladakh: Himalaya ezezaguna– Santurtziko Kresala aretoan egingo dute; irailaren 23an, osteguna, arratsaldeko 20:00etan.

Eta datozen hilabeteetarako ere badituzte hainbat aurreikusita:


Azaroak 3: Zornotzako Zelaieta Zentroan, 16:00etan
Azaroak 12: Legazpiko Kultur Etxean, 20:00etan
Azaroak 16: Zarauzko Pagoeta Mendia Taldearen aretoan, 20:00etan
Azaroak 18: Urnietako Gazte Informazio Bulegoan, 19:30ean
Azaroak 23: Errenteriako Urdaburu Mendi Elkartearen Egoitzan, 20:00etan
Azaroak 29: Donostiako Okendo Kultur Etxean, 19:30ean
Abenduak 10: Azkoitiko Kultur Etxean, 19:30ean
Abenduak 15: Donostiako Koldo Mitxelena aretoan, 19:30ean