Gasteizko 'Mazoka’ Marrazki eta Ilustrazio Azokan parte hartzeko izen-ematea zabaldu dute

Gasteizko Mazoka Marrazki eta Ilustrazio Azokaren IX. edizioa abenduaren 20tik 22ra izango da, Montehermoso kulturuneko ur-biltegian. Paperean, zeramikan zein oihalean egindako marrazki eta irudiak izango dira erakusgai bertan.

Erakusketa eta salmentarako 40 postu jarriko dituzte eta horietako batean egoteko izen-ematea zabaldu dute. Ilustrazioaren, komikigintzaren, animazioaren, diseinuaren edo artearen arloko profesional eta ez profesionalei zuzenduta dago. 

Interesdunek formularioa bete eta www.mazoka.org webgunean dauden parte hartzeko arauak onartu beharko dituzte irailaren 30a baino lehen. Urriaren 16an emango da epaimahaiaren erabakiaren berri.

Ikasleen bekaren deialdia
Mazokak ikasleei zuzendutako Bekikasle bekaren seigarren deialdia egingo du. Honako hau sartzen da deialdian: mazokalari plaza bat, 500 euro ordainsari gisa eta ekoizpenerako, ostatua eta webgune profesional baterako harpidetza. Bekaren helburua diseinuaren, ilustrazioaren, marrazkigintzaren, animazioaren eta arte plastikoen arloan balio berriak aurkitu eta babestea da eta horiek ibilbide luzeko kideekin egoteko eta esperientzia partekatzeko aukera izatea.